ABŞ Hərbi Dəniz Qüvvələrinə məxsus helikopter və qırıcı təyyarəsi oktyabrın 26-da Cənubi Çin dənizi üzərində qəzaya uğrayıb.
NOCOMMENT.az xəbər verir ki, bu barədə ABŞ Sakit Okean Donanmasının “Facebook” səhifəsində məlumat paylaşılıb.
Məlumata görə, yerli vaxtla təxminən saat 14:45-də Nimitz aviavdaşıyıcı gəmisindən qalxan ABŞ Hərbi Dəniz Qüvvələrinə məxsus MH-60R Sea Hawk vertolyotu plana uyğun əməliyyatlar apararkən Cənubi Çin dənizinin sularında qəzaya uğrayıb. Axtarış-xilasetmə əməliyyatı nəticəsində hər üç ekipaj üzvü uğurla xilas edilib.
Bu insidentdən sonra saat 15:15-də “Fighting Redcocks”a məxsus F/A-18F Super Hornet təyyarəsi də Nimitz aviadaşıyıcı gəmisindən qalxaraq adi əməliyyatlar apararkən Cənubi Çin dənizində qəzaya uğrayıb. Hər iki ekipaj üzvü axtarış-xilasetmə qüvvələri tərəfindən xilas edilib.
ABŞ Sakit Okean Donanması bildirir ki, insidentdə iştirak edən bütün tərəflər təhlükəsizlikdə və stabil vəziyyətdədir, hazırda hər iki insidentin səbəbi araşdırılır.
Xatirə SADİQ
