Rusiya və ABŞ arasındakı qeyri-rəsmi əlaqələr iki ölkə arasında dialoqun hələ də mühüm tərkib hissəsi olaraq qalır.
Redaktor.az xəbər verir ki, bu barədə Rusiya prezidentinin mətbuat katibi Dmitri Peskov bildirib.
Onun sözlərinə görə, bu əlaqələr xüsusilə ABŞ-nin Rusiyaya qarşı bir sıra dost olmayan addımlar atdığı dövrdə daha da önəmlidir.
Peskov əlavə edib ki, Rusiya Birbaşa İnvestisiya Fondunun rəhbəri və prezidentin xüsusi nümayəndəsi Kirill Dmitriyevin ABŞ-a səfəri bu uzun prosesdə “kiçik, lakin vacib bir addım” kimi qiymətləndirilir. O vurğulayıb ki, belə işlər üçün çox səbir və diqqət tələb olunur.
Bu səfər və qeyri-rəsmi əlaqələr, ekspertlərin fikrincə, iki ölkə arasında münasibətlərin tədricən normallaşdırılmasına xidmət edə bilər və dialoqu davam etdirmək üçün vacib vasitədir.
Aytəkin TOFİQQIZI
