Bu gün Bakıda keçirilən Əlil Təşkilatları İttifaqının (ƏTİ) 20 illik fəaliyyətinə həsr olunmuş tədbirdə ƏTİ-nin prezidenti Davud Rəhimli iştirakçılara təşəkkürünü bildirib və İttifaqın yaranma tarixindən, məqsəd və fəaliyyət istiqamətlərindən danışıb.
QHT.az xəbər verir ki, onun sözlərinə görə, 2003-cü ildə əlillik sahəsində fəaliyyət göstərən səkkiz təşkilatın bir araya gəlməsi ilə Əlil Təşkilatları İttifaqı təsis olunub və 2005-ci ildə dövlət qeydiyyatına alınıb:
“Bu gün İttifaqda 41 təşkilat birləşib və hər biri özünəməxsus fəaliyyət istiqamətinə malikdir. Bizim əsas məqsədimiz onların fəaliyyətini əlaqələndirmək, əməkdaşlığı gücləndirmək və beynəlxalq tərəfdaşlıqları inkişaf etdirməkdir,” – deyə Davud Rəhimli qeyd edib.
Prezident vurğulayıb ki, İttifaqın yaranması respublikada əlillik sahəsində yeni bir mərhələnin başlanğıcı olub və bu sahədə birgə fəaliyyət və qarşılıqlı əməkdaşlığın inkişafına şərait yaradıb.
