Bakı, 28 oktyabr, AZƏRTAC
Rusiyanın “LUKoil” şirkəti bildirir ki, aktivlərin satışı Xəzinədarlıq Departamentinin Xarici Aktivlərə Nəzarət İdarəsi (OFAC) tərəfindən verilən bağlanma lisenziyası çərçivəsində həyata keçirilir və bu lisenziya müəyyən müddət ərzində məhdud əməliyyatlara imkan verir.
AZƏRTAC xarici mediaya istinadla xəbər verir ki, şirkət bazar ertəsi günü verdiyi açıqlamada ABŞ və Böyük Britaniya tərəfindən tətbiq edilən son sanksiyalardan sonra xarici aktivlərini satmaq planlarını açıqlayıb.
Bəyanatda deyilir: “LUKoil” elan edir ki, bir sıra ölkələr tərəfindən şirkətə və onun törəmə şirkətlərinə qarşı məhdudlaşdırıcı tədbirlərin tətbiqi səbəbindən beynəlxalq aktivlərini satmaq niyyətindədir”. Potensial alıcıların təkliflərinin nəzərdən keçirilməsinə başlandığı da əlavə edilib.
Şirkət, həmçinin beynəlxalq aktivlərinin davamlı fəaliyyətini təmin etmək üçün lisenziyanın uzadılmasını tələb edə biləcəyini bildirib.
Vaşinqton bu yaxınlarda Prezident Donald Trampın Rusiyanın enerji sektorunu hədəf alan yeni tədbirlərinin bir hissəsi olaraq “LUKoil” və “Rosneft”, həmçinin onların 34 törəmə şirkətinə qarşı blok sanksiyaları tətbiq edib.
Böyük Britaniya hökuməti də oktyabrın ortalarında “LUKoil” şirkətini sanksiya siyahısına daxil edib.
Sanksiyaların elan edilməsindən sonra “LUKoil” şirkətinin bazar dəyəri ötən həftə kəskin şəkildə aşağı düşüb. O, təqribən 3,7 milyard dollar itirib. Analitiklər xəbərdarlıq ediblər ki, məhdudiyyətlər Rusiyanın enerji ixracını daha da zəiflədə, habelə logistika və qiymətlərə təzyiqi artıra bilər.
