Bu gün şair-publisist Tural Turanın ad günüdür.
Kulis.az bu münasibətlə müəllifi təbrik edir və şeirlərini təqdim edir.
Əllərimin yaddaşı
Əllərim dil açır
gecənin içindən keçən tənha işığa.
Yalvarır o işığın kölgəsiz addımlarına ki,
öz doğum günündə güllələməsin
yanaqlarına əsir düşən payızı.
Əllərimin səsi eşidilmir bu gecə də,
çıxıb gedir o tənha işıq,
çıxıb gedir
payızın sonuncu doğum gününə sarı.
...Və günəşin dirijorluğunda
yıxılır bütün küləklər
Ay işığının boynundan asılan
edam kötüklərinə tərəf...
O an dili tutulur ovuclarımın,
unudur gecə işıqlarına söykənən
bütün and yerlərini.
Silinir,
silinir əllərimin yaddaşından
bütün müqəddəslər...
35 yaşın şeiri
Hərdən
divardakı fotolarım səsləyir arxadan,
səsləyir ki, göy üzündən alnına məktub var.
Hərdən
qoluma girir, Tanrının işıq tərəfi.
Hərdən
ayaq izimi qocaqlayır kölgəm.
Hərdən
hər üçü deyir ki,
bətnimizdən qopma, şair;
Qopub düşmə
səsini güllələyən payızın
əlil qucaqlarına...
Alnımdakı səngərdən keçirəm hərdən,
boylanıram ara-sıra,
boylanıram hələ məni tanımayan
əlləri çəlikli tabutuma sarı...
Bir azdan
ömrünü donduran saatın
əqrəbləri yüyürəcək mənə sarı.
And yerini unutmuş qucağıma yıxılacaq
son savaşdan da sağ çıxan
otuz beş yaşım...
Yazı masama günaydın deyəcək,
anamın otuz altıncı duası...
Sonra
yenə Tanrı üşüməyim deyə
çiynimə salacaq nimdaş kölgəmi
və
bütün xatirələr əynini dəyişəcək...
ağ-qara fotolarımın arxasında!..
16 oktyabr 2024, Bakı
Səni elə sevdim ki...
Səni elə sevdim ki,
Tanrı qısqandı
bütün yaratdıqlarını.
Səni elə sevdim ki,
sərxoş oldu göy üzündəkilər.
Səni elə sevdim ki,
son nəfəsin qadını,
qucağımda can verdi
ayağın dəyən səkilər...
Səni elə sevdim ki,
ləpələrindən
küsdü bütün küləklər...
Səni elə sevdim ki,
saçlarından
özünü asdı küləklər.
Səni elə sevdim ki,
Yağışın qanı dondu.
Əyni dəyişdi qışın,
öz andını soyundu...
Səni elə sevdim ki,
döyüntüm də karıxdı.
Səni elə sevdim ki,
Tanrı göydə darıxdı...
Səni elə sevdim ki,
bir də həmin fəsildə
kimsəni sevməyəcəklər...
