Rusiyanın ikinci ən böyük neft istehsalçısı olan “Lukoil” neft şirkəti ABŞ-ın sanksiyalar elan etməsindən sonra beynəlxalq aktivlərini satacağını açıqlayıb.
Hafta.az-ın yazdığına görə, “Lukoil”in bəyanatında deyilir: “Aktivlərin satışı Xarici Aktivlərə Nəzarət İdarəsinin (OFAC) ləğvetmə lisenziyası çərçivəsində həyata keçirilir. Şirkət beynəlxalq aktivlərinin fasiləsiz işləməsini təmin etmək üçün zəruri hallarda lisenziyanın uzadılması üçün müraciət etməyi planlaşdırır”.
Həmçinin əlavə edilib ki, potensial alıcılardan təkliflər qiymətləndirilir.
Qeyd edək ki, oktyabrın 22-də ABŞ prezidenti Donald Tramp Rusiyanın Ukraynadakı müharibəyə son qoymaq üçün sülh prosesinə ciddi sadiqliyini nümayiş etdirməməsinə görə ən böyük neft şirkətləri olan “Lukoil” və “Rosneft” şirkətlərinə sanksiyalar tətbiq edib.
Rəhbəri azərbaycanlı iş adamı Vahid Ələkbərov olan “Lukoil” qlobal istehsalın təxminən 2 faizini istehsal edir. “Lukoil”un mənası Qərbi Sibirdəki ənənəvi neft kəşfiyyatı bölgəsindəki üç neft şəhərinin adının baş hərflərindən qaynaqlanır: Lanqepas, Ural və Koqalim.
Şirkətin ən böyük xarici aktivi, dünyanın ən böyüklərindən olan və 75 faiz paya sahib olduğu İraqdakı Qərbi Kurna 2 neft yatağıdır. Yatağın hasilatı apreldə gündə 480 min bareli keçib. Şirkət həmçinin Balkanlarda ən böyük olan Bolqarıstanda gündə 190 min barel istehsal edən “Lukoil” Neftohim Burqas neft emalı zavoduna və Rumıniyada “Petrotel” neft emalı zavoduna sahibdir. Macarıstan və Slovakiya ilə yanaşı, “Lukoil” həmçinin Azərbaycan SOCAR-ına məxsus Türkiyədəki STAR neft emalı zavoduna da neft tədarük edir.
Bundan əlavə, şirkət həmçinin Avropada neft terminallarında və pərakəndə yanacaq şəbəkələrində paya malikdir. O, Qazaxıstan da daxil olmaqla, Orta Asiyada, eləcə də Afrika və Latın Amerikasında müxtəlif istehsal və satış layihələri həyata keçirir.
