Avropa Avtomobil İstehsalçıları Assosiasiyası (ACEA) Avropa İttifaqı (Aİ) ölkələrinin yanvar-sentyabr dövrü üzrə yeni avtomobil qeydiyyatı məlumatlarını açıqlayıb.
Marja xəbər verir ki, amerikalı milyarder İlon Maskın sahibi olduğu Tesla şirkətinin avtomobil satışları Avropa İttifaqı (Aİ) ölkələrində azalma tendensiyasını davam etdirib. Tesla satışlarındakı azalma Avropada sentyabr ayı ilə birlikdə artıq doqquzuncu aya çatıb.
Ötən ilin sentyabr ayında 31 min 535 ədəd olan Tesla satışları, bu ilin eyni ayında 25 min 656 ədədə düşüb. Beləliklə, Tesla-nın Aİ bazarındakı satışları sentyabrda ötən ilin eyni dövrü ilə müqayisədə 18,6% azalıb.
Markanın sentyabrda Aİ-dəki ümumi yeni avtomobil satışlarındakı payı da 3,9%-dən 2,9%-ə enib. Tesla-nın Aİ ölkələrində yanvar-sentyabr dövründəki satışları ötən ilin eyni dövrü ilə müqayisədə 38,7% azalıb.
Ötən ilin yanvar-sentyabr dövründə Aİ ölkələrində 181 min 572 olan Tesla satışları, bu ilin eyni dövründə 111 min 328 səviyyəsində qalıb. Bu müddətdə şirkətin Aİ bazarındakı ümumi payı da 2,3%-dən 1,4%-ə düşüb.
Aİ-yə üzv ölkələr, Avropa Azad Ticarət Birliyinə üzv İsveçrə, Norveç və İslandiya ilə Böyük Britaniyada Tesla satışları sentyabr ayında ötən ilin eyni ayına nisbətən 10,5% azalaraq 39 min 837 ədədə, yanvar-sentyabr dövründə isə 28,5% geriləyərək 173 min 694 ədədə düşüb.
Tesla-nın Avropa ölkələrindəki satışları bu ilin əvvəlindən bəri davamlı olaraq azalır.
Maskın uzun müddət ABŞ-ın sabiq prezidenti Donald Tramp ilə yaxın əməkdaşlıq etməsi, mübahisəli davranışları və Avropa ölkələrində ifrat sağçı siyasətçilərə verdiyi açıq dəstək, avropalıların şirkətlə aralarına məsafə qoymasına səbəb olub.
