Bakı, 29 oktyabr, AZƏRTAC
Nyu-Yorkda yaşıl standartlara malik yüksək texnologiyalı göydələn istifadəyə verilib.
AZƏRTAC beynəlxalq mediaya istinadən xəbər verir ki, “Foster + Partners” məşhur Britaniya şirkəti tərəfindən layihələndirilən “270 Park Avenue” binasının hündürlüyü 423 metrdir. Bu da onu ABŞ-da ən hündür yeni binalarından biri edir.
Qüllə hazırda “JPMorgan Chase” investisiya bankının qlobal miqyasda yeni əsas binasıdır. Qlobal reytinqdə yalnız 35-ci yerdə olsa da, Nyu-York şəhərində altıncı, ABŞ-da isə səkkizinci ən hündür göydələndir.
“270 Park Avenue” göydələni onun yerində ucaldılan əvvəlki çoxmərtəbəli binanı əvəz edib və dar bir şəhər sahəsində məhdud məkan səbəbindən unikal dizaynla fərqlənir. Bina küçə səviyyəsindən güclü sütunlar üzərində ucaldılıb, onun gözəçarpan şüşə fasadı Manhettenin çoxsaylı düzbucaqlı şüşə qüllələri ilə müsbət şəkildə ziddiyyət təşkil edir.
60 mərtəbəli qüllədə 10 min əməkdaş işləyir və buranı hər gün minlərlə qonaq ziyarət edir. Burada səkkiz böyük pərakəndə satış sahəsi, ofis sahələri, eləcə də ümumi yığıncaqlar və digər böyük tədbirlər üçün məkanlar var. Yuxarı mərtəbələrdə rəhbərlik və müştəri qəbul üçün sahələr yerləşir.
Heç bir superhündür göydələn həqiqətən də ekoloji hesab edilə bilməsə də, “270 Park Avenue” göydələnində karbon izini azaldan mühüm davamlılıq inkişaf elementləri realizə edilib.
O, “LEED Platinum” yaşıl standartına layiq görülüb, əvvəlki binanın sökülməsindən sonra materialların 97 faizi isə emal edilərək təkrar istifadə edilib. Bu, sıfır əməliyyat emissiyasına malik Nyu-York şəhərinin ən böyük tam elektrikli qülləsidir (yəni onun gündəlik enerji istifadəsi heç bir xalis karbon emissiyası yaratmır). O, həmçinin üçqat şüşələmə, avtomatik tündləşdirmə sistemləri və su istehlakının azaldılması və təkrar istifadə edilməsi sistemləri ilə təchiz edilib.
