Göygöl Rayon Məhkəməsində mənimsəmədə təqsirləndirilən Amil Baxışovun (soyadı şərtidir) cinayət işi üzrə məhkəmə istintaqı başa çatıb.
Pravda.az-ın əldə etdiyi məlumata görə, hakim Rəşad Mustafayevin sədrliyi ilə keçirilən prosesdə hökm oxunub.
Məhkəmənin hökmü ona təqsirləndirilən şəxs Cinayət Məcəlləsinin 179.2.4-cü (mənimsəmə) maddəsi ilə nəzərdə tutulmuş cinayət əməlini törətməkdə təqsirli bilinib, Cinayət Prosessual Məcəlləsinin 44.2.1 və 39.1.3-cü maddələrinə əsasən ona cəza təyin edilməyib. Amil Baxışovun barəsində seçilmiş polisin nəzarəti altına vermə qətimkan tədbiri ləğv olunub. İddiaçının cavabdehə qarşı maddi və mənəvi zərər tələbinə dair mülki iddiası qismən təmin edilib. Təqsirləndirilən şəxs 9700 manat maddi zərər, 1000 mənəvi zərər və 122,10 manat dövlət rüsumu olmaqla ümumilikdə 10 822,10 manat məbləğində pul tutularaq iddiaçıya ödənilməsi barədə hökm çıxarılıb.
İttihama görə, Amil Baxışov Göygöl rayonu, Üçbulaq kəndi ərazisində yerləşən “Nurud” su sexinin sahibi Fəxrəddin
Allahverdiyevlə 01 avqust 2014-cü il tarixdə bağlanmış əmək müqaviləsinə əsasən həmin obyektdə gözətçi vəzifəsinə təyin edilib. Təqsirləndirilən şəxsə 07 sentyabr 2014-cü il tarixdə qarşılıqlı imzalanmış təhvil-təslim aktı ilə etibar edilmiş, sexdə yerləşən və Fəxrəddin Allahverdiyevə məxsus əmlak üzərində vahid tamah niyyəti ilə qəsd edərək həmin əmlakı qeyri-qanuni və əvəzsiz şəkildə mənimsəmək (talamaq) qərarına gəlib.
İstintaqla müəyyən edilib ki, 2018-ci ilin mart–aprel ayları ərzində Amil “Nurud” su sexində yerləşən əşyaları və texnikanı qanunsuz olaraq götürüb, satıb və ya şəxsi istifadə etmək üçün evinə aparıb.
Nəticədə o, zərərçəkmişə ümumilikdə 15 920 manat məbləğində maddi ziyan vurub.
Kamal Məmmədov
