Bir neçə gün öncə vurduğu qollarla Rusiya gündəmini zəbt edən "Dinamo Moskva"nın azərbaycanlı futbolçusu Ülvi Babayev yenidən diqqət mərkəzinə düşüb.
Publika.az xəbər verir ki, o, Rusiyanın gənclər (U-21) yığmasının genişləndirilmiş heyətinə çağırılıb. Baş məşqçi İvan Şabarov noyabrda Qırğızıstanda keçiriləcək beynəlxalq turnirdə 21 yaşlı vingerə şans verə bilər.
Qeyd edək ki, Babayev AFFA-nın milli komandaya cəlb etmək istədiyi azərbaycanlı futbolçulardan biridir. Əslən İmişlidən olan Ülvinin atası Laçın Babayevlə bu məsələ ətrafında müzakirə aparılıb, lakin danışıqlar açıq qalıb.
Ülvinin Azərbaycan millisində çıxış etmək ehtimalı hələ də var. Buna səbəb onun Rusiyanın əsas yığmasında rəsmi oyun keçirməməsidir. FİFA qarşılıqlı razılıq olduğu halda aşağı yaş qrupları üzrə komandalarda çıxış edən futbolçulara idman vətəndaşlığını dəyişməyə icazə verir.
