Bu yaxınlarda məişət əşyaları, elektronika və digər məhsullarla yüklənmiş Çin-Avropa yük qatarı Uyğur Muxtar Rayonu ərazisindəki Xorqos keçidindən Polşanın Malaşeviç stansiyasına yola düşüb. Bununla da, 2025-ci ilin əvvəlindən bəri həmin keçiddən çıxan Çin-Avropa və Çin-Mərkəzi Asiya qatarlarının sayı 8 mini ötüb.
Hafta.az-ın yazdığına görə, Xorqos Gömrük İdarəsinin məlumatında deyilir ki, bu ilin əvvəlindən bəri Xorqos keçidindən keçən Çin-Avropa və Çin-Mərkəzi Asiya qatarlarının yola düşmə sayı artmaqda davam edib. Yantszı və İnci çaylarının deltaları və Çinin digər bölgələrindən getdikcə daha çox mal bu “polad dəvələr” vasitəsilə Orta Asiya və Avropa bazarlarına daşınır.
Xatırladaq ki, bu ilin may ayında Xorqos sərhəd keçid məntəqəsində ağıllı dəmir yolu keçid məntəqəsinin tətbiqi və gömrük rəsmiləşdirilməsinin sürətləndirilməsi məqsədilə islahat tədbirlərinə başlanılıb. Nəticədə, idxal olunan malların keçid məntəqəsindən keçmə müddəti 70 faiz azaldılaraq 2-3 gündən 16 saatdan da az müddətə endirilib.
Hazırda qatarlar Xorqos dəmir yolu keçid məntəqəsindən 18 ölkənin 46 şəhər və bölgəsini əhatə edən 90 marşrut üzrə hərəkət edir. Bu sərhəd keçid məntəqəsindən 50 mindən çox Çin-Avropa və Çin-Mərkəzi Asiya yük qatarı keçib.
