Səyahətçilərin rahatlığı üçün yaradılmış bəzi hava limanları artıq sadəcə keçid məntəqəsi deyil, özlüyündə bir turizm məkanı sayılır. AzPost xəbər verir ki, Forbes Travel Guide tərəfindən dünyanın ən yaxşı hava limanı elan edilən Sinqapurun Çangi aeroportu məhz belə yerlərdəndir.
Ekspertlərin qiymətləndirməsinə əsasən, Çangi aeroportu illərdir müxtəlif reytinqlərdə birincilik qazanır və bu dəfə də liderliyini qoruyub. Mütəxəssislər bildiriblər ki, hava limanı lüks oteli xatırladır və burada sərnişinlərin rahatlığı üçün misilsiz şərait yaradılıb.
Çangi aeroportunun daxilində dünyanın ən hündür qapalı şəlaləsi yerləşir. Bundan əlavə, sərnişinlər üçün 24 saat fəaliyyət göstərən kinozal, kəpənək və bambuk bağları, eləcə də damda yerləşən üzgüçülük hovuzu və cakuzi mövcuddur. Bu, uçuşdan əvvəl stressi azaltmaq və vaxtı xoş keçirmək üçün ideal şərait yaradır.
Turizm eksperti Ken Tanaka “Japan Travel News” nəşrinə bildirib ki, Çangi aeroportu artıq təkcə nəqliyyat mərkəzi deyil, həm də Sinqapurun turistik simvollarından birinə çevrilib. Onun sözlərinə görə, səyahətçilərin əksəriyyəti bu hava limanında tranzit zamanı şəhərə çıxmaq istəmir, çünki aeroportun özündə görməyə və dincəlməyə kifayət qədər maraqlı məkanlar var.
Maraqlıdır ki, Forbes Travel Guide reytinqində dünyanın ən yaxşı aviaşirkəti də açıqlanıb. Bu dəfə fəxri titul Birləşmiş Ərəb Əmirliklərinin “Emirates” aviaşirkətinə verilib. Ekspertlər bu qərarı şirkətin yüksək xidmət səviyyəsi, sərnişin rahatlığına yönəlmiş konsepsiyası və uçuş təhlükəsizliyi ilə əsaslandırıblar.
Sinqapurun Çangi aeroportu və “Emirates”in uğurları bir daha göstərir ki, müasir səyahət anlayışı artıq sadəcə nöqtədən-nöqtəyə hərəkət deyil, həm də komfort, estetika və təcrübə məsələsidir.
