ABŞ və Çin liderlərinin gündəmində nadir torpaq metalları, tariflər və münasibətlərin “yenidən başlanması” ehtimalı var...
Poliqon xəbər verir ki, ABŞ Prezidenti Donald Tramp və Çin lideri Si Cinpin arasında bu həftə keçiriləcək görüş son aylarda davam edən qlobal iqtisadi gərginliyə son qoya bilər. The Guardian yazır ki, sammitdə əsas müzakirə mövzuları nadir torpaq metalları, ticarət tarifləri və iki nəhəng iqtisadiyyat arasında münasibətlərin yenidən qurulması olacaq.
İki lider 2019-cu ildən bəri ilk dəfə şəxsən görüşəcək. O vaxtdan bəri Rusiya-Ukrayna müharibəsi, Vaşinqtonun Çin texnoloji irəliləyişi ilə bağlı narahatlıqları və ticarət balansı üzərindəki köhnə mübahisələr ABŞ-Çin münasibətlərini daha da gərginləşdirib.
Ekspertlərin fikrincə, bu sammitin ən mühüm nəticəsi konkret sənədlərin imzalanmasından çox, dünyanın iki ən nüfuzlu lideri arasında konstruktiv dialoqun mümkünlüyünü təsdiqləmək olacaq. Tramp, Vaşinqtondakı “şahinlər”in sərt mövqelərinə baxmayaraq, Si Cinpinə qarşı nisbətən yumşaq ton nümayiş etdirir. Alman Marşall Fondunun proqram direktoru Bonni Qleyzerin sözlərinə görə, “Si özünü Tramp üzərində nəzarəti saxlamağa qadir lider kimi görür və bu mərhələdə bu inam onun diplomatik davranışına açıq şəkildə təsir edir”.
Müşahidəçilər hesab edirlər ki, əgər bu görüş real nəticə verərsə, ABŞ və Çin iqtisadi sistemlərinin stabilləşməsi, eləcə də beynəlxalq bazarlarda gərginliyin azalması üçün yeni bir mərhələnin başlanğıcı ola bilər.
Poliqon.info
