ABŞ ordusu bir həftə ərzində ikinci dəfə narkoticarət marşrutu üzrə hərəkət edən gəmiyə “ölümcül zərbə” endirib...
Poliqon xəbər verir ki, ABŞ müdafiə naziri Pit Heqset sosial şəbəkə X-də paylaşım edərək, Amerika qüvvələrinin Sakit okeanın şərq hissəsində narkotacirlərə məxsus bir gəmiyə ölümcül zərbə endirdiyini bəyan edib. Onun sözlərinə görə, əməliyyat nəticəsində dörd narkotacir məhv edilib.
Heqset bildirib ki, ABŞ kəşfiyyat məlumatlarına əsasən həmin gəmi “qanunsuz narkotik qaçaqmalçılığında iştirak edib və tanınmış narkoticarət marşrutu üzrə hərəkət edirdi”. “Qərb yarımkürəsi artıq narkoterrorçular üçün təhlükəsiz liman deyil”, deyə Pentaqon rəhbəri əlavə edib.
Bu əməliyyat Sakit okeanda həyata keçirilən ikinci belə zərbədir. Bir həftə əvvəl Heqset oxşar hücum haqqında məlumat vermişdi. O zaman ABŞ qüvvələri iki qaçaqçının olduğu gəmiyə hücum edərək onu batırmışdı.
ABŞ sentyabr ayının əvvəlindən etibarən narkotik daşıdığı ehtimal edilən gəmilərə qarşı hədəfli əməliyyatlar həyata keçirir. Əksər bu tip zərbələr Karib dənizi akvatoriyasında baş verir və Vaşinqtonun narkotrafikə qarşı yeni regional strategiyasının tərkib hissəsi hesab olunur.
Poliqon.info
