Donald Trampın sözlərinə görə, Çin lideri müharibənin diplomatik yolla dayandırılması üçün səylər göstərəcək...
Poliqon xəbər verir ki, ABŞ prezidenti Donald Tramp Cənubi Koreyanın Pusan şəhərində Çin Xalq Respublikasının sədri Si Cinpinlə keçirdiyi görüşdən sonra açıqlama verib. Tramp bəyan edib ki, Çin lideri Ukrayna münaqişəsinin nizamlanmasına yardım etməyə söz verib.
Trampın sözlərinə görə, danışıqlar zamanı tərəflər qlobal təhlükəsizlik, enerji və sülh təşəbbüsləri də daxil olmaqla bir sıra beynəlxalq məsələləri müzakirə ediblər. ABŞ prezidenti qeyd edib ki, Si Cinpin münaqişənin diplomatik yolla həlli üçün mümkün vasitəçilik səylərini göstərməyə hazır olduğunu bildirib.
Ekspertlər hesab edirlər ki, Pekinin bu mövqeyi Çinin neytral vasitəçi kimi rolunu gücləndirə və Vaşinqtonla Moskva arasında balanslaşdırılmış sülh prosesinin formalaşmasına təsir göstərə bilər. Bununla belə, analitiklər vurğulayırlar ki, Çinin real təsir imkanları məhduddur, çünki Rusiya ilə strateji tərəfdaşlığı qorumaq Pekin üçün hələ də prioritetdir.
Tramp isə danışıqlardan sonra bildirib ki, “Çinlə birgə atılacaq addımlar sülhə doğru mühüm addım olacaq” və Vaşinqton diplomatik kanalların açıq qalması üçün çalışacaq.
Poliqon.info
