ABŞ prezidentinin səfərindən sonra Si Tsinpinin Vaşinqtona rəsmi ziyarəti planlaşdırılır...
Poliqon xəbər verir ki, ABŞ prezidenti Donald Tramp 2026-cı ilin aprel ayında Çinə rəsmi səfər edəcəyini açıqlayıb. Prezidentin sözlərinə görə, bu səfərin ardınca Çin Xalq Respublikasının sədri Si Tsinpinin ABŞ-a cavab ziyarəti baş tutacaq.
Tramp qeyd edib ki, qarşıdan gələn səfər ABŞ və Çin arasında siyasi, iqtisadi və təhlükəsizlik sahələrində əməkdaşlığın dərinləşdirilməsi məqsədi daşıyır. Onun fikrincə, bu görüşlər iki ölkə arasında “yeni dialoq mərhələsinin başlanğıcı” olacaq və qlobal sabitlik üçün əhəmiyyətli nəticələr doğura bilər.
Ağ Evin mənbələri bildirirlər ki, səfər zamanı tərəflərin ticarət balansı, texnoloji məhdudiyyətlər, Tayvan məsələsi və iqlim əməkdaşlığı kimi bir sıra mövzuları müzakirə edəcəkləri gözlənilir.
Diplomatik müşahidəçilər hesab edirlər ki, Trampın Çinə səfəri və ardınca Si Tsinpinin Vaşinqtona gəlişi iki supergüc arasında əlaqələrin bərpası və qarşılıqlı etimadın gücləndirilməsi istiqamətində mühüm addım ola bilər.
Poliqon.info
