Avropa Parlamenti isə bu yanlış “strategiya”nın praktik nəticələrini Azərbaycanın Avronest Parlament Assambleyasının sessiyasında iştirak etməkdən imtina etməsi timsalında gördü
Azərbaycan Milli Məclisinin nümayəndə heyətinin Avronest Parlament Assambleyasının 12-ci plenar iclasında iştirak etməkdən imtina etməsi, son bir neçə ildə ölkəmizə qarşı qərəzli mövqe tutan Avropa Parlamentinin və əlaqəli qurumların sistemli xəttinə cavab olaraq atılmış məntiqi addım idi.
Ölkə.az xəbər verir ki, bunu deputat Kamran Bayramov Milli Məclisdə çıxışı zamanı deyib.
Deputat bildirib ki, Avropa Parlamenti ilə Şərq Tərəfdaşlığı ölkələri arasında dialoq platforması kimi yaradılan Avronest Parlament Assambleyası əvvəlcə yaxınlaşma və etimad mexanizmi kimi təsəvvür edilirdi: “Lakin zaman keçdikcə bu ideya siyasi təzyiqlə və bərabərlik və qarşılıqlı hörmət prinsiplərindən çox uzaq olan qərəzli qətnamələrlə əvəz olundu”.
O əlavə edib ki, son illərdə Avropa Parlamenti dəfələrlə Ermənistanla Azərbaycan arasındakı münaqişə ilə bağlı faktları təhrif edən qətnamələr qəbul edib və bu qətnamələrdə qurum rəsmi Bakını Ermənistana qarşı “təcavüz”də ittiham edib və Azərbaycanın beynəlxalq ictimaiyyət tərəfindən tanınan suveren ərazisində hərəkət etməsi faktını sanki unudub:
“Avropa yanaşmasının absurdluğu onun ayrı-seçkiliyində xüsusilə özünü göstərir. Avropa Parlamenti “Qarabağ ermənilərinin hüquqları”nı təmtəraqla müzakirə edir, lakin Ermənistandan zorla qovulmuş azərbaycanlıların hüquqlarını tamamilə tanımır - Brüssel hələ də bu məsələ ilə bağlı bir qətnamə belə qəbul etməyib.
Bu təxribatlara baxmayaraq, son aylarda Bakı və Yerevan davamlı sülh yaratmaq istəyini nümayiş etdiriblər və Azərbaycan artıq Ermənistan üçün malların öz ərazisindən tranzitinə qoyulan bütün məhdudiyyətləri aradan qaldırmaqla buna nail olmaq üçün konkret addımlar atıb. Bütün bunlar Bakının mehriban qonşuluğa və regionun sabit təhlükəsizlik arxitekturasına inteqrasiyasına sadiqliyini nümayiş etdirir.
Lakin iki ölkə sülhə doğru irəliləyərkən, müəyyən Avropa dairələri Cənubi Qafqazı keçmişə qaytarmağa çalışaraq bir daha etimadsızlıq və düşmənçilik ritorikasını alovlandırmağa çalışırlar.
Bu, Avropa Parlamentinin oktyabrın 29-da qəbul etdiyi və Ermənistan-Azərbaycan münasibətlərinə həsr olunmuş açıq-aşkar təxribat xarakterli sənəddə də öz əksini tapıb.
Problem təkcə qətnamələrin və sənədlərin məzmununda deyil, həm də öz mənəvi üstünlüyünə arxayın olan Avropa qurumlarının düşüncə tərzindədir. Avropa Parlamenti Cənubi Qafqazda insan hüquqları ilə bağlı qərarları asanlıqla qəbul etsə də, Avropada miqrantların hüquqlarının pozulması, islamofobiyanın artması və ya öz ölkələrində milli azlıqlara qarşı ayrı-seçkiliyin həyata keçirilməsi barədə susmağa üstünlük verir.
Bizim regionumuza gəldikdə isə, qoca qitə, dünyanın istənilən yerində olduğu kimi, burada da ərazi bütövlüyü, daxili işlərə qarışmama və suverenliyə hörmət kimi eyni beynəlxalq prinsiplərin tətbiq olunduğunu unudur. Avropa təsisatları bunları siyasi populizmlə əvəz etməklə yaxınlaşmaq niyyətində olan dövlətləri bir-birindən uzaqlaşdırmağa çalışır. Avropa Parlamenti isə bu yanlış “strategiya”nın praktik nəticələrini Azərbaycanın Avronest Parlament Assambleyasının sessiyasında iştirak etməkdən imtina etməsi timsalında gördü”.
Mürtəza
- Gecə Modu
- Ana səhifə
- Statistika
- Mənbələr
- Reytinq
- Hava
- Valyuta
