Almaniya müdafiə startapları "Helsing" və "Stark" ilə kamikaze dronlarının tədarükü üçün müqavilə bağlamaq niyyətindədir. Beləliklə, ölkə Rusiyaya qarşı müdafiəni gücləndirməklə yanaşı, müdafiə sektorunda rəqabəti stimullaşdırmağa çalışır...
Poliqon xəbər verir ki, bu barədə Financial Times qəzeti məsələ ilə tanış olan üç mənbəyə istinadən yazıb.
Onların sözlərinə görə, iki alman startapı və ölkənin ən böyük podratçısı "Rheinmetall" hər biri təxminən 300 milyon avro dəyərində müqavilədən pay alacaq.
FT mənbəyi bildirib ki, müqaviləyə əsasən, üç şirkət 12.000-ə qədər dron tədarük etməyə razılaşacaq, lakin onlardan yalnız bir neçəsi dərhal tədarük ediləcək.
Məqalədə əlavə edilib ki, onların NATO-nun şərq cinahını Rusiyadan qorumaq üçün Litvada yerləşdirilən yeni Alman briqadasına tədarük edilməsi gözlənilir. Nəşrin mənbələrinə görə, rəsmilər tenderin üç şirkət arasında bölünməsinin innovasiyanı təşviq edəcəyinə ümid edirlər.
Mənbələrdən biri vurğulayıb ki, onlar bunu rəqabəti dəstəkləmək və ən yaxşı sistemə sahib olmalarını təmin etmək üçün edirlər.
FT bildirib ki, "Spotify"ın qurucusu Daniel Ekin dəstəyi ilə yaradılan "Helsing" Avropada 12 milyard avro dəyərində ən bahalı müdafiə startapıdır.
Məlumdur ki, son bir il ərzində şirkət Ukraynaya 6000 hücum dronunun tədarükünü planlaşdırdığını, Almaniyanın təyyarə istehsalçısı "Grob"u satın aldığını və Böyük Britaniyada sualtı müşahidə sistemləri istehsal etməyi planlaşdırdığını açıqlayıb.
"Cəmi 15 ay əvvəl qurulan "Stark" amerikalı texnologiya milyarderi Peter Thiel və Silikon Vadisinin "Sequoia Capital" şirkəti də daxil olmaqla investorlar tərəfindən dəstəklənir. Startapın Ukraynada sınaq və inkişafla məşğul olan bir komandası var və iyul ayında İngiltərənin Svindon şəhərində fabrikin açılışını elan etdi", deyə nəşr əlavə edib.
Nəşrin iki həmsöhbətinin sözlərinə görə, "Rheinmetall" sentyabr ayında ictimaiyyətə təqdim etdiyi FV-014 adlı silahlı dronu Almaniya ordusuna təhvil verməyi təklif edib. Bu dron 5 kq yük daşıya bilir və 100 km uçuş məsafəsinə malikdir.
Poliqon.info
