BAKI, 31 oktyabr. TELEQRAF
Qırğızıstan yaxın onilliklərdə əhalinin sürətli qocalması ilə üzləşəcək.
Teleqraf xəbər verir ki, bu barədə Qırğızıstan mətbuatı məlumat yayıb.
Proqnoza görə, 2030-cu ilə qədər 65 yaşdan yuxarı vətəndaşların sayı 7, 2050-ci ilə qədər isə 19 faizə çatacaq. Qeyd edilib ki, bu, Qırğızıstanı bu baxımdan Avropa ölkələri ilə yaxınlaşdıracaq, sosial müdafiə və səhiyyə sistemləri qarşısında yeni çağırışlar yaradacaq.
“Qırğızıstan demoqrafik qocalma mərhələsinə qədəm qoyub. Bu, uzaq gələcək deyil, sistemli və qurumlararası həll tələb edən mövcud reallıqdır. Ən aktual problemlərdən biri 75 yaşdan yuxarı insanların sayının artmasıdır, bu, xüsusi diqqət və dəstək tələb edən ən həssas yaş qrupudur”, - qırğız ekspertlər deyiblər.
Məlumata görə, sürətli demoqrafik dəyişikliklər, yoxsulluğun yüksək səviyyəsi, regional qeyri-bərabərlik və ixtisaslaşdırılmış xidmətlərin inkişaf etməməsi təhlükə yaradır, həmçinin ölkədə aktiv qocalmanın inkişafı üçün yeni imkanlar açır.
