Ali Məhkəmədə hədə-qorxu ilə tələb etmədə təqsirləndirilən Elgün Ocaqverdiyevin barəsindəki qərardan verilən kassasiya şikayəti üzrə məhkəmə iclası başa çatıb.
Pravda.az-ın əldə etdiyi məlumata görə, hakim İlqar Qılıcovun sədrliyi ilə keçirilən prosesdə qərar elan olunub.
Qərara əsasən, kassasiya şikayəti təmin edilməyib.
İttihama görə, Elgün Ocaqverdiyev hədə-qorxu ilə tələb etmə ilə yanaşı, soyğunçuluqda və qanunsuz soyuq silah saxlamaqda ittiham edilib.
Ona hədə-qorxu ilə tələb etmə ittihamı ona görə verilib ki, Elgün tanışı Qulam Ağayevin (şərti) keçmiş kürəkəni Valeh Quliyevə (şərti) 14 il əvvəl borc verdiyi, hələ də ala bilmədiyi 30 min dollar pulu öz bildiyi formada geri qaytaracağına söz verib. Pulu ala biləcəyi halda ona “hörmət” ediləcəkmiş.
İstintaq materiallarında yazılıb ki, Elgün hədə-qorxu gəlmək üçün V.Quliyevin yaşadığı evin qarşısına gələrək içərisində 1 ədəd təlim əl-qumbarası və 1 ədəd saplağı qırılmış qərənfil gülü olan bağlamanı qapının ağzına qoyub. Evdən uzaqlaşdıqdan sonra isə V.Quliyevə zəng edib, keçmiş kürəkənə borcunu qaytarmayacağı halda ailə üzvlərinin həyatına son qoyacağını deyib. Xəbərdarlıq edib ki, bundan nəticə çıxarmasa, yaxın vaxtlarda evinə daha bir təhlükəli bağlama göndərəcək.
Elgün Ocaqverdiyev saxlanıldıqdan sonra onun başqa bir şəxsə qarşı soyğunçuluq etdiyi də məlum olub. Həmin əmələ görə də ona əlavə ittiham verilib.
Bakı Ağır Cinayətlər Məhkəməsinin hökmü ilə Elgün Ocaqverdiyev 8 il müddətinə azadlıqdan məhrum edilib. Bakı Apellyasiya Məhkəməsinin qərarına əsasən, şikayət təmin edilməyib.
Kamal Məmmədov
