Bakı Ağır Cinayətlər Məhkəməsində xuliqanlıqda təqsirləndirilən Ümid Həsənov və onun tanışı, xuliqanlıqda, qəsdən sağlamlığa ağır zərər vurmada ittiham olunan Fəxri Nəbizadənin (hər ikisinin adı, soyadı şərtidir) cinayət işi üzrə məhkəmə istintaqı başa çatıb.
Pravda.az-ın əldə etdiyi məlumata görə, hakim Fəxri Məmmədovun sədrliyi ilə keçirilən prosesdə hökm oxunub.
Məhkəmənin hökmü Ümid Həsənov 1 il 4 ay 28 gün müddətə azadlığın məhdudlaşdırılması (elektron qolbaq) cəzasına məhkum olunub. Fəxri Nəbizadəyə isə şərti cəza verilib və məhkəmə zalından azadlığa buraxılıb.
İttiham aktına görə, Fəxri Nəbizadə 10 iyun 2024-cü il tarixdə, saat 21:00 radələrində, tanışı Ümid Həsənovla birlikdə Bakı şəhəri, Nəsimi rayonu, Hüseyn Seyidzadə küçəsində yerləşən istirahət parkında fəaliyyət göstərən “Gülüm” çay evində olarkən ictimai qaydanı kobud surətdə pozan, cəmiyyətə açıq-açıq hörmətsizlik ifadə edən qərəzli xuliqanlıq hərəkətləri edib.
Belə ki, həmin vaxt çay evinə gələn tanışı, zərərçəkmiş Müslüm Əkbərli (adı, soyadı şərtidir) onun barəsində digər şəxs tərəfindən göndərilmiş xoşagəlməz səs yazısının səbəbinə aydınlıq gətirmək istəyib. O, bu məqsədilə zərərçəkmişi parkın içərisinə çağırıb, ona qarşı nalayiq ifadələr işlədib.
Daha sonra Fəxri Ümidlə birlikdə Mülümə qarşı zor tətbiq etməklə bədəninin müxtəlif nahiyələrinə yumruq zərbələri vurub. Nəticədə zərərçəkmişin başın sol təpə və ənsə nahiyələrinin əzilmiş-cırılmış yaraları kimi, sağlamlığın qısa müddətə pozulmasına səbəb olan yüngül bədən xəsarətləri yetirib.
Daha sonra Fəxri Ümidin xəbəri olmadan, xuliqanlıq niyyəti ilə üzərində olan bıçaqla Müslümə zor tətbiq edib, onun kürək nahiyəsindən iki zərbə vuraraq xəsarət yetirib.
Hadisədən sonra hər iki şəxs saxlanılaraq cinayət məsuliyyətinə cəlb edilib və Fəxri Nəbizadə barəsində həbs qətimkan, Ümid Həsənov barəsində isə başqa yerə getməmək haqqında iltizam qətimkan tədbiri seçilmişdi.
Kamal Məmmədov
