ain.az bildirir, Azpost saytına əsaslanaraq.
Rusiyanın elm adamları uzaq məsafədən, elektromaqnit dalğalarının köməyi ilə enerji yığa bilən yeni tip batareya yaradıblar. AzPost TASS informasiya agentliyinə istinadla xəbər verir ki, bu texnologiya Altay Dövlət Aqrar Universitetinin mütəxəssisləri tərəfindən hazırlanıb və artıq patentləşdirilib.
Yeni qurğu dronların enerji mənbəyi kimi işləyir və onu birbaşa elektrik şəbəkəsinə qoşmadan doldurmaq mümkündür. Alimlərin sözlərinə görə, elektromaqnit tezliklərlə enerji ötürmə üsulu bir neçə yüz metr məsafədən işləyə bilir. Bu, pilotsuz uçuş aparatlarının uzun müddət enmədən fəaliyyət göstərməsinə şərait yaradır.
Layihənin əsas üstünlüyü ondadır ki, sistem tamamilə avtonom işləyir və istilik enerjisini birbaşa elektrikə çevirir. Batareyanın əsas hissəsini təşkil edən qrafit nüvəsi elektromaqnit dalğaları təsiri ilə qızdırılır, quraşdırılmış termocütlər isə yaranan istiliyi elektrik axınına çevirir. Eyni zamanda, sistemin sabit işləməsi üçün xarici hissələrdə aktiv soyutma mexanizmi tətbiq olunur.
Sınaqlar zamanı batareyanın 70 santimetr məsafədən sabit enerji istehsal etdiyi təsdiqlənib. Bunun üçün adi sənaye invertoru istifadə olunub. Alimlər hesab edirlər ki, bu nailiyyət gələcəkdə pilotsuz uçuş aparatları üçün naqilsiz enerji doldurma məntəqələrinin yaradılmasına imkan verəcək.
Mütəxəssislərin fikrincə, bu texnologiya müasir pilotsuz uçuş sistemlərinin əsas problemlərindən biri – məhdud uçuş müddəti məsələsini aradan qaldıra bilər. Yeni sistem sayəsində dronlar enerji ötürülən sahə daxilində demək olar ki, fasiləsiz fəaliyyət göstərə biləcəklər. Bu isə xüsusilə geniş ərazilərin monitorinqi, kənd təsərrüfatı nəzarəti və uzunmüddətli tapşırıqların yerinə yetirilməsi üçün mühüm əhəmiyyət daşıyır.
AzPost.az
Paylaş
Daha ətraflı məlumat və yeniliklər üçün ain.az saytını izləyin.
