“Cənab Prezident İlham Əliyevin Azərbaycan Milli Elmlər Akademiyasındakı çıxışında ölkənin bugünkü həyatı, onun tarixi keçmişi, dünya siyasətində mövqeyi, müasir dünyada özünü göstərən təmayüllər, hətta belə şəraitdə Azərbaycanın qarşısında dayanan vəzifələr tam şəkildə öz əksini tapdı. Bu istiqamətlərin arasında Azərbaycan üçün yeni sayılan bir sıra sahələr var. Bunlarla əlaqədar Prezident İlham Əliyev qarşıya çox ciddi vəzifələr qoydu. Birinci növbədə süni intellekt, kibertəhlükəsizlik, rəqəmsallaşma, yeni texnologiyalardan istifadə kimi Azərbaycan dövlətinin qarşısında dayanan vəzifələrin dəqiq şərhini verdi. Çox haqlı və sərrast şəkildə qeyd olundu ki, ölkənin inkişafı heç də təbii sərvətlərin üzərində qurulmalı deyil. Təbii sərvətlər sadəcə bir vasitədir. Ölkənin inkişafının əsas şərti və dayağı müasir texnologiyalardan, insan amilindən, süni intellektdən, rəqəmsallaşma texnologiyalarından lazımi səviyyədə istifadə olunmasından ibarətdir”.
Bu sözləri Pravda.az-a açıqlamasında Mətbuat Şurasının İdarə Heyətinin üzvü, “Bakı Xəbər” qəzetinin baş redaktoru Aydın Quliyev deyib.
O bildirib ki, Prezident İlham Əliyevin çıxışında, xüsusilə, kibertəhlükəsizlik sahəsində dövlətin, cəmiyyətin qarşısında dayanan vəzifələr bir daha aktuallaşdırılıb: “Azərbaycan cəmiyyətinə, dövlət strukturlarına vacib mesajlar verildi ki, kibertəhlükəsizlik təkcə ordu sahəsindən, xalqın, vətənin keşiyində ayıq-sayıq dayanılmasından ibarət deyil. Hazırkı şəraitdə ölkələrin təhlükəsizliyini təhdid edən mənbələrdən biri məhz kibertəhlükəsizlik amilidir. Bu kiberfaktorlardan əmələ gələn təhlükələrə, təhdidlərə qarşı mübarizə daim diqqət mərkəzində olmalıdır. Çox maraqlıdır ki, Prezident ölkə iqtisadiyyatının yeni texnologiyalar üzərində qurulması, həm rəqəmsallaşmanın daha geniş miqyasda tətbiqi, həm də kibertəhlükəsizlik problemlərinin həllində cəmiyyətin bütün təbəqələri ilə bərabər alimlərin, ölkənin ziyalı korpusunun da xüsusi vəzifələr, missiyalar altında olduğunu qeyd etdi. Ölkənin kibertəhlükəsizliyinin təmin olunması, iqtisadi inkişafın rəqəmsallaşdırılması, iqtisadi inkişafın bütün sahələrində yeni texnologiyaların tətbiqində alimlərin, intellektual təbəqənin iştirakı mühüm vəzifə kimi qarşıya qoyuldu. Çox yaxşı haldır ki, rəqəmsallaşma, kibertəhlükəsizlik, süni intellekt kimi məsələlərin daha da dərinləşdirilməsi üçün alimlərin qarşısında geniş bir cəbhənin açılması zərurəti vurğuladı. Cənab Prezident bu kimi sahələrə alimlərin daha yaxından cəlb olunmaları üçün dövlət orqanlarının ölkənin alimləri ilə, elmi institutlarla daha yaxından əməkdaşlıq etməsini vacib vəzifə kimi qarşıya qoydu. Bir sözlə, Azərbaycanın qarşısında kibertəhlükəsizlik texnologiyalarından, rəqəmsallaşmadan daha geniş şəkildə istifadə olunması dövrü açılıb. Bu dövrün əsas xüsusiyyətlərini, çağırışlarını Prezident məruzəsində dəqiq ifadə etdi”.
Aytəkin Qardaşova
