Rusiya aktivlərini saxlayan Avropa trastlarında başlayan böhran Karib ofşorlarına da keçib.
Musavat.com xəbər verir ki, bu barədə “The Financial Times” qəzeti məlumat yayıb.
ABŞ-ın Rusiyaya qarşı sanksiyalarından sonra idarəçilərini itirən Lixtenşteyndəki yüzlərlə trast indi Böyük Britaniyanın yurisdiksiyasına keçmək təhlükəsi ilə üz-üzədir. Nəticədə Britaniya Virciniya, Baham və Kayman adalarında yerləşən bir çox ofşor strukturlar da iflic vəziyyətinə düşüb.
Hüquqşünaslar bildirirlər ki, rusiyalı benefisiarların aktivlərini qorumaq getdikcə mümkünsüzləşir, çünki çoxsaylı beynəlxalq hüquq şirkətləri artıq onlarla işləməkdən imtina edir.
Lixtenşteyn Avropanın populyar vergi ofşor zonalarından biri hesab olunur. Lakin ABŞ sanksiyalarından sonra bu ölkədə fəaliyyət göstərən yüzlərlə trast idarəçisiz qalıb — yəni nə aktivləri idarə edə bilən, nə də onların ləğv prosesinə nəzarət edən şəxslər mövcuddur.
Bu trastlar adətən bahalı yaxtalar, daşınmaz əmlak, özəl təyyarələr və digər varlıqların qeydiyyata alındığı hüquqi şəxslərin sahibləridir. Onların filial strukturları Karib hövzəsindəki digər ofşorlarda yerləşir və indi həmin şirkətlər də idarəetmə böhranına məruz qalıb.
Ekspertlərin sözlərinə görə, Lixtenşteyn trastı çox vaxt Britaniya Virciniya adalarında qeydiyyatdan keçmiş şirkətin əsas səhmdarı olur, həmin şirkət isə öz növbəsində Baham adalarında başqa bir şirkətə nəzarət edə bilər. Bu çoxpilləli quruluş sayəsində sahibkarlar kapital artımı vergisi və ƏDV kimi ödənişlərdən yayınmağa nail olurlar.
Lakin bu şirkətlər əsas idarəçi trastın göstərişləri ilə fəaliyyət göstərdiyindən, illik qeydiyyat haqlarının ödənilməməsi halında onlar inzibati və investisiya qərarları qəbul etmək hüququnu itirirlər.
Beləliklə, “zombi-trastlar” fenomeni - yəni hüquqi baxımdan mövcud, lakin idarəedilməyən və dondurulmuş aktivlərə malik strukturlar - indi artıq təkcə Avropada deyil, Karib dənizi ofşorlarında da yayılmağa başlayıb.
Musavat.com
