Biz Avropa İttifaqına (Aİ) üzvlük məsələsindən siyasi alət kimi istifadə etmək məqsədi daşıyan və Gürcüstan ilə Aİ arasında münasibətlərə xələl gətirən bütün cəhdləri pisləyirik.
"Unikal" xəbər verir ki, Gürcüstan Xarici İşlər Nazirliyinin Avropa Komissiyasının Aİ-nin genişlənməsinə dair hesabatının dərcinə münasibət bildirib.
Sənəddə Avropa Komissiyasının hesabatında Gürcüstanla bağlı bir sıra hadisələrə qərəzli qiymət verildiyi qeyd edilir.
Gürcüstan Xarici İşlər Nazirliyinin məlumatına görə, Aİ təsisatlarının Gürcüstana qarşı atdığı addımlar və bəyanatlar narahatlıq doğurur, çünki onlar Gürcüstanın daxili siyasətinə təsir etmək məqsədi daşıyır və Gürcüstan-Aİ münasibətlərinin ruhuna ziddir.
“2025-ci il noyabrın 4-də Avropa Komissiyası namizəd və potensial namizəd ölkələrin, o cümlədən Gürcüstanın Aİ-yə üzvlük istiqamətində göstərdiyi səylərə dair hesabatı özündə əks etdirən Genişlənmə Siyasəti üzrə Birgə Kommunikasiyanı dərc etdi. Genişlənmə Hesabatının Gürcüstanla bağlı əsassız mənfi qiymətləndirmələr və gələcək siyasi spekulyasiyalar üçün istifadə edilməsi narahatedicidir. Təəssüflə qeyd etmək lazımdır ki, Avropa Komissiyasının Gürcüstanla bağlı hesabatında bir sıra hadisələrə qərəzli qiymət verilir ki, bu da gözlənilməz deyildi, xüsusən də Aİ institutları 4 oktyabr 2025-ci ildə yerli seçkilər zamanı Tbilisidə baş vermiş hadisələrlə bağlı Gürcüstanın dövlət qurumlarına qarşı hücum və zorakılıqlara inadla göz yumdular”, - deyə Gürcüstan Xarici İşlər Nazirliyinin bəyanatında bildirilir.
Qeyd olunur ki, Avropa İttifaqı institutlarının Gürcüstana qarşı atdığı addımlar və bəyanatlar Gürcüstanın daxili siyasətinə təsir etmək məqsədi daşıyır və həm Gürcüstan-Avropa İttifaqı münasibətlərinin ruhuna, həm də ümumi maraqlara ziddir: “Biz Gürcüstan-Aİ münasibətlərinə xələl gətirən Aİ-yə üzvlük məsələsindən siyasi alət kimi istifadə edilməsini pisləyirik. Gürcüstan hökuməti məsuliyyətli və sadiq tərəfdaş kimi Avropa İttifaqı ilə məcburiyyət əsasında deyil, ümumi dəyərlər və prinsiplərə əsaslanan qarşılıqlı hörmət, konstruktiv və faydalı əməkdaşlıq arzusunu bir daha təsdiqləyir”.
