Günəşdə noyabrın 4-ü axşam saatlarında güclü X1.8 sinifli partlayış baş verib. AzPost Günəş Astronomiyası Laboratoriyasına istinadla xəbər verir ki, hadisə Moskva vaxtı ilə saat 20:15-də başlayıb, 36 dəqiqə davam edib və maksimal nöqtəsinə 20:34-də çatıb.
Məlumata görə, partlayışın mənbəyi daha əvvəl də aktivlik nümayiş etdirən 4274 nömrəli Günəş sahəsi olub. Bu, son beş ayda qeydə alınan ən güclü hadisə sayılır – sonuncu oxşar partlayış (X1.9 sinifli) 2025-ci ilin iyununda müşahidə edilmişdi.
Alimlər bildirirlər ki, X sinifinə aid partlayışlar Günəşdə müşahidə olunan ən güclü hadisələrdir və çox vaxt koronal kütlə atımı ilə müşayiət olunur. Bu cür proseslər Yer istiqamətində baş verdikdə, güclü maqnit qasırğalarına səbəb ola bilər.
Lakin ilkin hesablamalara əsasən, bu dəfə baş verən partlayış zamanı Günəş plazmasının axını təxminən 55 dərəcə bucaq altında, Yerdən uzaq istiqamətə yönəlib. Buna görə də, alimlər birbaşa təsirin baş verməyəcəyini ehtimal edirlər.
Mütəxəssislər xəbərdarlıq edirlər ki, aktiv Günəş sahələri növbəti günlərdə Yerə tərəf döndükcə, oxşar güclü partlayışların başvermə ehtimalı yüksək olaraq qalır. Bununla yanaşı, X1.8 partlayışından öncə iki daha zəif – M sinifli alışma da qeydə alınıb.
