SUDANDA VƏTƏNDAŞ MÜHARİBƏSİNDƏ 40 NƏFƏR HƏLAK OLUB » AzadMedia.az

Sudanda ordu ilə ÇEVİK DƏSTƏK QÜVVƏLƏRİ — RSF adlı paramilitar qrup arasında 2023-cü ilin aprelindən bəri davam edən vətəndaş müharibəsi yeni mərhələyə keçib. Ötən həftə RSF qüvvələrinin El-Fəşer şəhərini ələ keçirməsi ordunun Darfurdakı son dayaq nöqtəsinin itirilməsi deməkdir. Şəhərin süqutundan sonra beynəlxalq qurumlar yüzlərlə insanın öldürüldüyünü, qadınlara qarşı zorakılıq və qarət hallarının baş verdiyini bildirirlər.

Beynəlxalq Cinayət Məhkəməsinin prokurorları artıq El-Fəşerdə törədilən mümkün hərbi cinayətlər və insanlığa qarşı cinayətlər üzrə sübut toplamağa başlayıblar. RSF rəhbərliyi isə iddiaları rədd edir, lakin “pozuntuların araşdırılacağına” söz verir.

Eyni zamanda, Kordofan bölgəsində vəziyyət daha da gərginləşib. El-Obeid yaxınlığında keçirilən dəfn mərasiminə pilotsuz uçuş aparatları ilə hücum nəticəsində azı 40 nəfər həlak olub, onlarla insan yaralanıb. Hücumun RSF tərəfindən həyata keçirildiyi bildirilir. Həmin bölgədə son günlər 20 mindən çox insan evlərini tərk edərək El-Obeidə sığınıb.

BMT-nin qida təhlükəsizliyi üzrə beynəlxalq şəbəkəsi xəbərdarlıq edib ki, El-Fəşer və Kaduqli şəhərləri artıq aclığın ən kritik mərhələsinə çatıb. RSF tərəfindən uzunmüddətli mühasirə və təchizat yollarının bağlanması nəticəsində bölgələrdə ərzaq, su və dərman qıtlığı yaşanır.

QURUMA görə, aclıq vəziyyəti əhalinin ən azı 20 faizinin ciddi qida çatışmazlığı yaşadığı, 5 yaşadək uşaqların 30 faizindən çoxunun arıqladığı və hər 10 min nəfərə azı iki ölüm halının düşdüyü hallarda elan edilir.

Son hesabatda bildirilir ki, Darfur və Kordofan bölgələrində təxminən 375 min nəfər artıq aclığa məruz qalıb, ümumilikdə isə 6,3 milyon insanın kəskin aclıq riski altında olduğu qeyd olunur.

BMT baş katibi Antoniu Quterreş isə Dohada çıxışı zamanı “Sudandakı vəziyyətin sürətlə nəzarətdən çıxdığını” bəyan edib və tərəfləri dərhal danışıqlara başlamağa çağırıb. Onun sözlərinə görə, “El-Fəşer və ətraf ərazilər hazırda aclıq, zorakılıq və kütləvi köçkünlük mərkəzinə çevrilib”.

ABŞ və bir sıra Qərb ölkələri Sudanda atəşkəsin bərpası və siyasi dialoqun başlanması üçün yeni “sülh yol xəritəsi” təklif edib. Lakin indiyə qədər Səudiyyə Ərəbistanı və Bəhreyndə keçirilən bir neçə raund danışıqlar nəticə verməyib — tərəflər bir-birini razılaşmaları pozmaqda ittiham edir.

BMT-nin son hesabatına görə, vətəndaş müharibəsinin başlamasından bəri 150 mindən çox insan həyatını itirib, 12 milyona yaxın sakin isə evlərini tərk etməyə məcbur qalıb. Sudandakı vəziyyət hazırda dünyada ən ağır humanitar böhran kimi qiymətləndirilir.