"Gürcüstanda hakim partiyanın üç əsas müxalifət qüvvəsinin fəaliyyətinin qadağan edilməsi üçün Konstitusiya Məhkəməsinə müraciət etməsi ölkənin demokratik inkişaf trayektoriyasında həlledici mərhələdir. Bu addım təkcə daxili siyasi nizamın dəyişdirilməsi cəhdi deyil, həm də Gürcüstanın beynəlxalq mövqeyi və geosiyasi orientasiyası baxımından ciddi siqnaldır". Bu sözləri SİA-ya açıqlamasında politoloq Tofiq Abbasov deyib.
Onun sözlərinə görə, söhbət siyasi plüralizmin gələcəyindən gedir. Demokratik sistemin əsas sütunu olan rəqabətli siyasi mühitin zəiflədilməsi həm siyasi institutlara, həm də seçici iradəsinin təmsil olunmasına fundamental zərbə vurur. Bu cür təşəbbüslər isə cəmiyyət daxilində qütbləşməni dərinləşdirə, radikallaşma meyillərini gücləndirə və sosial-siyasi sabitliyə mənfi təsir göstərə bilər: "Gürcüstanın Qərb inteqrasiya kursu ciddi suallar altına düşür. Avropa İttifaqı və ABŞ-ın Gürcüstanla münasibətlərində demokratik prinsiplər, hüququn aliliyi və siyasi rəqabətin qorunması açar məqamlardır. Bu kontekstdə müxalifətin sistematik şəkildə zəiflədilməsi Qərbin Gürcüstana dair siyasi və iqtisadi dəstəyində azalma riskini artırır və Tbilisinin Avro-Atlantik proseslərdə sürət itirməsinə səbəb ola bilər. Regional geosiyasi balans məsələsidir.
Gürcüstanın demokratik dəyərlərdən uzaqlaşması ölkənin Qərb strukturlarından nisbətən məsafələşməsi, buna paralel olaraq Rusiya təsir xəttinə yaxınlaşması istiqamətində interpretasiya oluna bilər. Bu isə Cənubi Qafqazda güc balansında yeni dinamikalar yarada, həm Gürcüstanın daxili təhlükəsizlik arxitekturasını, həm də enerji-nəqliyyat layihələrinin gələcəyini təsirləndirə bilər. Hakim partiyanın bu addımı təkcə hüquqi və siyasi proses deyil, strateji seçim mahiyyəti daşıyır. Gürcüstan ya demokratik institutların gücləndirilməsi xəttinə sadiq qalaraq Qərblə inteqrasiyasını dərinləşdirəcək, ya da siyasi monolitliyə üstünlük verərək regional güc dinamikalarının dəyişməsi fonunda fərqli geosiyasi orbitə sürüşəcək. Hazırkı mərhələ ölkənin siyasi gələcəyinin müəyyənləşməsi baxımından kritik dövrdür".
