Diabet, yəni şəkər xəstəliyi, orqanizmdə qan şəkərinin normadan yüksək olması ilə xarakterizə olunan xroniki metabolik xəstəlikdir.
Pravda.az bildirir ki, bu vəziyyət əsasən insülin hormonunun çatışmazlığı və ya bədənin insulini düzgün istifadə edə bilməməsi nəticəsində yaranır.
İnsülinin rolu
İnsülin pankreas tərəfindən istehsal olunan bir hormondur və qlükozanın (qan şəkərinin) hüceyrələrə daxil olaraq enerji kimi istifadə edilməsini təmin edir. İnsülinin kifayət qədər istehsal olunmaması və ya təsirinin zəifləməsi qan şəkərinin artmasına səbəb olur.
Diabetin növləri
Tip 1 diabet: Adətən uşaqlıq və gənclik dövründə ortaya çıxır. Pankreas insülin istehsal edə bilmir və xəstə ömür boyu insulindən asılı olur.
Tip 2 diabet: Ən çox rast gəlinən növdür. Bədəndə insülin istehsal olunur, lakin hüceyrələr ona qarşı həssaslığını itirir. Artıq çəki, hərəkətsiz həyat tərzi və genetik meyillik risk faktorları sırasındadır.
Hamiləlik (gestasion) diabeti: Yalnız hamiləlik dövründə yaranır və doğuşdan sonra keçsə də, gələcəkdə Tip 2 diabet riskini artıra bilər.
Diabetin təhlükələri
Müalicə edilmədikdə yüksək qan şəkəri damar, böyrək, göz və sinir sisteminə ciddi zərər verə bilər. Bu səbəbdən erkən diaqnoz və düzgün müalicə həyati əhəmiyyət daşıyır.
Mütəxəssislər sağlam qidalanma, müntəzəm fiziki fəaliyyət və qan şəkərinin nəzarətdə saxlanmasının diabetin qarşısını almaqda mühüm rol oynadığını bildirir.
Əminə Bayramova
