UEFA Çempionlar Liqasının 2025/2026 mövsümünün ümumi mərhələsinin IV turu çərçivəsində keçirilən “Qarabağ” – “Çelsi” oyunu 2:2 hesablı bərabərliklə başa çatıb.
90deqiqe.Az-ın məlumatına görə, görüş Bakıdakı Tofiq Bəhramov adına Respublika Stadionunda oynanılıb. Qarşılaşmanı avstriyalı hakim Sebastyan Qisxammer idarə edib.
Matçın hesabı 16-cı dəqiqədə “Çelsi”nin hücumçusu Estevaonun vurduğu qolla açılıb. 29-cu dəqiqədə “Qarabağ”ın yarımmüdafiəçisi Leandro Andrade tarazlığı bərpa edib. 39-cu dəqiqədə isə meydan sahiblərinin oyunçusu Marko Yankoviç penaltini dəqiq yerinə yetirərək komandasını önə keçirib.
İkinci hissənin 53-cü dəqiqəsində “Çelsi”nin yarımmüdafiəçisi Alejandro Qarnacho hesabı bərabərləşdirib.
Bu nəticədən sonra hər iki komanda 7 xal toplayıb. “Qarabağ” hazırda ümumi mərhələnin cədvəlində 12-ci, “Çelsi” isə 10-cu pillədə qərarlaşıb.
Növbəti turda Qurban Qurbanovun komandası noyabrın 25-də “Napoli” ilə, Enso Mareskanın rəhbərlik etdiyi “Çelsi” isə eyni tarixdə “Barselona” ilə qarşılaşacaq.
Qeyd edək ki, cari mövsümün final oyunu 2026-cı il mayın 30-da Budapeştdəki “Puşkaş Arena”da keçiriləcək.
