Təşkilat qadınların təhsil və əmək hüquqlarının bərpası üçün Kabulla danışıqları davam etdirir...
Poliqon xəbər verir ki, Birləşmiş Millətlər Təşkilatı Əfqanıstan hakimiyyətini qadınların təhsil almasına və işləməsinə qoyulan məhdudiyyətləri aradan qaldırmağa inandırmağa çalışır. Bu barədə BMT-nin baş katibinin Əfqanıstan üzrə xüsusi nümayəndəsinin müavini və ölkədəki humanitar koordinatoru İndriko Ratvatte “RİA Novosti”yə müsahibəsində bildirib.
Ratvattenin sözlərinə görə, Taliban administrasiyasının mövcud siyasəti qəbuledilməzdir, çünki bu, əfqan qadınlarını ictimai həyat və iqtisadi inkişafda iştirak imkanlarından məhrum edir. “Mən mütəmadi olaraq de-fakto hakimiyyətə müraciət edərək bu məhdudiyyətlərin ləğvini tələb edirəm”, deyə BMT rəsmisi vurğulayıb.
Onun sözlərinə görə, Əfqanıstan hökumətinin 2022 və 2023-cü illərdə imzaladığı fərmanlar qadınların qeyri-hökumət təşkilatlarında, eləcə də BMT-nin yerli qurumlarında işləməsini qadağan edib. Həmin sənədlər həmçinin qadınlara orta və ali təhsil almağı da qadağan edir.
Bununla belə, Ratvatte qeyd edib ki, hazırda təhsil və səhiyyə sahələrində çalışan qadınlar üçün müəyyən istisnalar tətbiq olunur. BMT rəsmisi bu istiqamətdə dialoqun davam etdiyini və beynəlxalq ictimaiyyətin qadınların hüquqlarının bərpası üçün təzyiqləri artırdığını bildirib.
Ekspertlər hesab edirlər ki, Əfqanıstanın bu siyasəti ölkənin beynəlxalq təcridini dərinləşdirir və humanitar böhranı daha da ağırlaşdırır.
Poliqon.info
