II əsrə aid mərmər fiqur demək olar ki, tam şəkildə qorunub saxlanılıb...
Poliqon xəbər verir ki, Xorvatiyanın Pula şəhərində aparılan arxeoloji qazıntılar zamanı yuxuda olan Kupidonun nadir mərmər heykəli aşkarlanıb. “Arkeonews” jurnalının məlumatına görə, tapıntı eramızın II əsrinə aiddir və ağ, xırda dənəli mərmərdən hazırlanıb. Heykəl demək olar ki, bütöv halda bu günə qədər gəlib çatıb.
Arxeoloqlar heykəli Pulanın tarixi mərkəzində, Kastropola küçəsində yerləşən qədim evin qalıqları arasında aşkar ediblər. Qazıntılar zamanı mərmər parçaları, divar və tavan freskalarının qalıqları da üzə çıxıb. Qədim dövrdə çökmüş bu otağın təyinatı hələ müəyyən edilməyib.
Tədqiqatçıların bildirdiyinə görə, heykəlin uzunluğu 98 sm, eni 44 sm, hündürlüyü isə 30 sm-dir. Kupidon qanadlı, çılpaq uşaq şəklində, aslan dərisi üzərində böyrü üstə uzanmış vəziyyətdə təsvir edilib. Başını aslanın başına söykəyən tanrının bu kompozisiyası, mifologiyada Kupidonun Herakldan Nemeya aslanının dərisini oğurladığı əfsanəyə istinad edir. Fiqurun yanında dərini pəncəsi ilə toxunan bir kərtənkələ təsvir olunub — alimlərə görə, bu, yenidən doğuluşun və yeni həyatın qədim simvoludur.
Arxeoloqlar qeyd edirlər ki, bu cür yuxuda olan Kupidon heykəlləri Roma incəsənətində bağlarda, fəvvarələrin yanında və ya uşaqlar üçün dəfn abidələri kimi istifadə olunub. Dünyada bu tipdə təxminən 200 heykəl məlumdur, lakin yalnız 25-də kərtənkələ motivi yer alır.
Tədqiqatçılar bildiriblər ki, heykəldə bir qanadın sınması və mərmərdə diaqonal çat kimi qədim dövrdən qalan zədələr müşahidə olunur. Mərmərin bir qədər qaralması da yanğın nəticəsində evin məhv olması ilə əlaqələndirilir.
Hazırda mütəxəssislər heykəlin lazer təmizlənməsi, sənədləşdirilməsi və bərpası üzərində işləyirlər. İşlər başa çatdıqdan sonra bu unikal tapıntı Pula İstriya Arxeologiya Muzeyinin daimi ekspozisiyasına daxil ediləcək.
Poliqon.info
