Azərbaycan xalqının tarixinə qızıl hərflərlə yazılmış 8 Noyabr – Zəfər Günü, dövlətimizin ərazi bütövlüyünün bərpası, milli birliyin, xalq–ordu–dövlət həmrəyliyinin parlaq təcəssümüdür. Bu gün Azərbaycan Respublikasının qüdrətini, xalqımızın iradə və mübarizə ruhunu bütün dünyaya nümayiş etdirən tarixi bir gündür.
2020-ci ilin 27 sentyabrında başlayan Vətən müharibəsi, 44 gün ərzində Azərbaycan Ordusunun şanlı döyüş yolu ilə nəticələnərək, işğal altında olan torpaqlarımızın azad edilməsi ilə yekunlaşdı. Prezident, Müzəffər Ali Baş Komandan İlham Əliyevin rəhbərliyi altında rəşadətli Ordumuz torpaqlarımızı mərdliklə azad etdi, illərlə həsrətində olduğumuz Şuşa şəhərinin 8 noyabr 2020-ci ildə azad edilməsi ilə böyük Zəfərin simvolu yarandı.
Zəfər Günü yalnız hərbi qələbə deyil, həm də milli ruhun, vətənpərvərliyin, dövlətçilik ideallarına sədaqətin təntənəsidir. Azərbaycan xalqı bu zəfərlə sübut etdi ki, öz torpaqlarını, azadlığını və suverenliyini qorumağa qadir olan, bir yumruq kimi birləşən xalq heç vaxt məğlub edilə bilməz.
44 günlük müharibə dövründə minlərlə qəhrəman oğul və qızlarımız Vətənin azadlığı uğrunda canlarından keçdi. Onların igidliyi, şəhidlərin müqəddəs qanı bahasına qazanılan bu qələbə hər bir azərbaycanlının qəlbində əbədi iz qoydu. Bu gün şəhidlərimizin ruhu qarşısında baş əyir, qazilərimizin fədakarlığını böyük ehtiramla yad edirik.
Prezident İlham Əliyevin və Birinci vitse-prezident Mehriban xanım Əliyevanın rəhbərliyi ilə azad olunmuş torpaqlarda bərpa və quruculuq işləri sürətlə aparılır. Şuşa, Füzuli, Zəngilan, Qubadlı, Laçın və digər rayonlarda yeni həyat başlayır. Müasir yollar, hava limanları, məktəblər, xəstəxanalar və yaşayış məntəqələri inşa olunur. Bu, Zəfərin davamı, gələcəyə yönələn inkişaf strategiyasının təntənəsidir.
Zəfər Günü bizə yalnız keçmişi xatırlatmır, həm də gələcəyə inamla baxmaq gücü verir. Azərbaycan xalqı bir daha göstərdi ki, milli birlik, dövlətə sədaqət və xalqın öz liderinə inamı ilə hər bir məqsədə nail olmaq mümkündür.
8 Noyabr – Zəfər Günü hər bir azərbaycanlının qəlbində iftixar, qürur və vətən sevgisi ilə dolu bir bayram kimi qeyd olunur. Bu möhtəşəm Zəfər – xalqımızın qəhrəmanlıq salnaməsi, dövlətimizin müstəqillik və suverenlik tarixinin ən parlaq səhifəsidir.
