ABŞ prezidenti Donald Tramp bildirib ki, idxal tariflərinin qanuniliyinə dair Ali Məhkəmədə başlanmış işdə Vaşinqtonun məğlubiyyəti ölkə üçün ciddi fəsadlar törədə bilər.
Editor.az xəbər verir ki, dövlət başçısı bu barədə “Fox News” telekanalına müsahibəsində danışıb.
“İcazə verin, belə ifadə edim: əgər uduzsaq, bu, ölkəmiz üçün dağıdıcı olacaq. Bu, tariximizin ən mühüm hadisələrindən biri olacaq”, – deyə Tramp vurğulayıb.
Onun sözlərinə görə, əgər ABŞ administrasiyası yeni idxal tarifləri tətbiq etməsəydi, həm Amerika, həm də digər ölkələr iqtisadi “depressiya” ilə üzləşərdi.
Ağ Evin mətbuat katibi Kerolayn Levitt noyabrın 2-də açıqlamasında bildirib ki, Tramp administrasiyası Ali Məhkəmənin tarifləri qanunsuz elan edəcəyi təqdirdə, ehtiyat planlar üzərində işləyir.
Hazırda ABŞ Ali Məhkəməsi prezidentin idxal mallarına rüsumlar tətbiq etməklə səlahiyyətlərini aşması barədə iddiaya baxır. Məhkəmədə administrasiyanı maliyyə naziri Skott Bessent təmsil edir.
//Gülnarə Abasova, Editor.az
