7 noyabr tarixində ABŞ-nin iri hava limanlarında təxminən 700 aviareys federal hökumətin fəaliyyətinin dayandırılması (şatdaun) fonunda ləğv olunub. Bu barədə bir neçə Amerika aviaşirkətinin məlumatına istinadən NBC telekanalı məlumat yayıb.
Məlumata görə, “American Airlines” — 220, “United Airlines” — 188, “Delta Air Lines” — 170, “Southwest Airlines” isə təxminən 100 reysi ləğv edib. Hökumətin fəaliyyətinin dayandırılması artıq 37 gündür davam edir.
Daha əvvəl ABŞ prezidenti Donald Trampın administrasiyası bəyan etmişdi ki, 7 noyabrdan etibarən ölkənin bir sıra böyük hava limanlarında uçuş həcmlərinə məhdudiyyətlər tətbiq olunacaq və şatdaun səbəbindən kosmik buraxılışlara yalnız günün müəyyən saatlarında icazə veriləcək.
ABŞ federal hökumətinin fəaliyyətinin qismən dayandırılması 1 oktyabr gecəsi maliyyələşdirmənin olmaması səbəbindən başlanıb. Bu, respublikaçılar və demokratların Konqresdə bir sıra xərclər üzrə razılığa gələ bilməməsi nəticəsində baş verib. Tərəflər hələ də razılığa gələ bilmirlər və bir-birini şatdaunu siyasi məqsədlərlə uzatmaqda ittiham edirlər.
Hazırkı hökumət fəaliyyətinin dayandırılması artıq ABŞ tarixində ən uzunmüddətli olub və 2018–2019-cu illərdə, Trampın ilk prezidentlik dövründə baş vermiş şatdaunun rekordunu yeniləyib. Həmin vaxt şatdaun 22 dekabr 2018-ci ildə başlayıb və 35 gün — 25 yanvar 2019-cu ilədək davam edib.
