Çin rəsmi olaraq özünün ən müasir və texnoloji baxımdan ən qabaqcıl təyyarədaşıyan gəmisi olan “Fujian”ı dəniz qüvvələrinin istifadəsinə təqdim edib.
Editor.az xəbər verir ki, dövlət mediasının məlumatına əsasən, gəminin istismara verilməsi Çin prezidenti Si Cinpinin iştirak etdiyi təntənəli mərasimlə elan olunub.
“Fujian” ölkənin üçüncü təyyarədaşıyan gəmisi olmaqla yanaşı, həm də elektromaqnit katapult sistemi ilə təchiz edilmiş ilk Çin istehsalı platformadır. Bu sistem döyüş təyyarələrinin daha yüksək sürətlə və qısa məsafədən havaya qalxmasına şərait yaradır ki, bu da Çin Hərbi Dəniz Qüvvələrinin əməliyyat imkanlarını əhəmiyyətli dərəcədə artırır.
Mütəxəssislərin fikrincə, “Fujian”ın istifadəyə verilməsi Pekinin dəniz gücü ambisiyalarında yeni mərhələ hesab olunur. Bu hadisə həm də Çin və ABŞ arasında Sakit okean bölgəsində artan strateji rəqabətin daha da kəskinləşdiyinə işarə kimi qiymətləndirilir.
Analitiklər hesab edirlər ki, bu addım Çin Xalq Azadlıq Ordusunun gələcəkdə regional və qlobal miqyasda daha geniş əməliyyat qabiliyyətinə malik olacağını göstərir.
//Gülnarə Abasova, Editor.az
