Lent az portalından verilən məlumata görə, ain.az xəbər yayır.
Meta şirkəti WhatsApp istifadəçilərinin bir-biri ilə ünsiyyət tərzini dəyişməyi planlaşdırır
Lent.az xarici mediaya istinadla xəbər verir ki, yaxın illərdə messencer telefon nömrələri əvəzinə istifadəçi adları (nickname) sisteminə keçəcək. Bu o deməkdir ki, mesaj göndərmək və ya zəng etmək üçün artıq öz nömrənizi paylaşmağa ehtiyac qalmayacaq.
Şirkət artıq WhatsApp Business tərəfdaşlarını telefon nömrəsinin alternativi olacaq “username” sisteminə keçid barədə məlumatlandırıb. Mənbələrin məlumatına görə, pilot mərhələ 2025-ci ildə başlayacaq, kütləvi tətbiq isə 2026-cı ildə gözlənilir. Yenilik məcburi olmayacaq - istifadəçi özü qərar verəcək: nik adından istifadə etmək istəyir, yoxsa nömrəsini saxlamaq.
Korporativ müştərilər üçün Meta “business-scoped user ID” adlı əlavə identifikator təqdim edir. Bu sistem şirkətlərə müştərilərlə əlaqə yaratmağa, amma onların telefon nömrələrini bilmədən ünsiyyət qurmağa imkan verəcək. Yeni identifikator webhook və API üzərindən işləyəcək, mövcud biznes sistemləri ilə uyğunluğu təmin edəcək.
İstifadəçilər üçün nə dəyişəcək
Hər bir istifadəçi unikal bir ad (nik) seçə biləcək və digər şəxslər onu bu adla tapa, mesaj yaza və ya zəng edə biləcəklər - nömrəni bilmədən. Bu, xüsusilə tanımadığınız biri ilə ilk əlaqədə şəxsi məlumatların qorunmasını xeyli artıracaq.
WhatsApp-ın test versiyalarında artıq niklə axtarış və zəng funksiyaları, həmçinin “username key” adlanan — lazımsız əlaqələri məhdudlaşdıran xüsusi kod sistemi sınaqdan keçirilir.
Bənzər yanaşma artıq Signal messencerində tətbiq olunur - burada istifadəçilər nömrələrini gizlədə və kimlərin onları tapa biləcəyinə nəzarət edə bilirlər. WhatsApp beləliklə Telegram və Signal kimi rəqiblərinin məxfilik yönümlü tendensiyasına qoşulur.
Meta, nikkərin tətbiqi ilə bağlı yaranacaq potensial problemlərə də hazırlaşır. Onlara populyar adların tutulması (squatting), brendlərin saxtalaşdırılması və oxşar adlarla fişinq halları daxildir. Bunun qarşısını almaq üçün şirkət adların erkən rezervasiyası sistemini və format məhdudiyyətlərini tətbiq edəcək. Biznes hesablar əvvəlki kimi “yaşıl işarə” ilə təsdiqlənəcək.
Bundan əlavə, istifadəçilərə kimlərin onlara nik vasitəsilə yaza və ya zəng edə biləcəyini idarə etməyə imkan verən yeni alətlər hazırlanır. WhatsApp filtrlər və görünürlük məhdudiyyətləri tətbiq etməklə spam və istənilməyən mesajların sayını azaltmaq niyyətindədir.
Qeyd etmək vacibdir ki, nik istifadəsi tam anonimlik təmin etmir - servis texniki məlumatları saxlamaqda davam edəcək və digər platformalar kimi hüquq-mühafizə orqanlarının qanuni sorğularını yerinə yetirəcək.
Yeniliyi nə vaxt gözləmək olar
"Meta"nın planına əsasən, hazırlıq mərhələsi 2025-ci ildə, funksiyanın tam tətbiqi isə 2026-cı ildə başlayacaq. Bununla belə, nik istifadəsi könüllü olacaq - istifadəçilər istəsələr nömrəni adla əvəz edə, istəməsələr əvvəlki kimi saxlaya biləcəklər.
Bu islahat WhatsApp-ın son illərdəki ən mühüm dəyişikliklərindən biri sayılır və messenceri həm rəqiblərinə daha yaxın, həm də müasir məxfilik və təhlükəsizlik standartlarına daha uyğun hala gətirəcək.
Daha ətraflı məlumat və yeniliklər üçün ain.az saytını izləyin.
