Azərbaycanda fəaliyyət göstərən “Uber” taksi platformasının son qərarı nəinki sürücülər, həm də sahibkarlar arasında ciddi narazılıq yaradıb.
Pravda.az-a verilən məlumatda bildirilib ki, şirkətin bonus siyasətində etdiyi dəyişiklik açıq-açıq ədalətsizlik və ayrıseçkilik nümunəsidir.
“Uber” istehsal ili 2018 və daha yuxarı olan avtomobillərlə çalışan sürücülərə əlavə bonuslar ayırıb, ondan köhnə avtomobillərlə fəaliyyət göstərənləri isə tamamilə diqqətdən kənarda qoyub. Bu qərar yüzlərlə sahibkarı hiddətləndirib.
Redaksiyamıza müraciət edən taksi parkı sahibləri bildiriblər ki, “Uber”in bu addımı nə iqtisadi məntiqə, nə ədalət prinsiplərinə, nə də rəqabət qanunvericiliyinə sığır.
Sahibkarlar xatırladırlar ki, illərdir “Uber”lə çiyin-çiyinə işləyir, onun Azərbaycanda fəaliyyətini qoruyub saxlamaq üçün bütün çətinliklərə sinə gəriblər. İndi isə şirkətin həmin əməkdaşlığı unutması, onları “köhnə maşın” bəhanəsi ilə yeni bonuslardan kənarda qoyması açıq-açıq hörmətsizlik kimi qiymətləndirilir.
Onların sözlərinə görə, dövlət həmin avtomobillərə taksi fəaliyyəti üçün icazə veribsə, “Uber”in hansı hüquqla bu icazəni görməzdən gəlib, öz “seçim qaydasını” tətbiq etməsi sual doğurur: “Əgər dövlət məsləhət bilməsəydi, bu avtomobillərə işləmək üçün icazə verməzdi. Dövlət sahibkarlara dəstək məqsədilə istehsal ili 15 ildən çox olmayan avtomobillərin fəaliyyətinə yaşıl işıq yandırdı. Biz də bu qərara inanaraq kreditə, lizinqə girib istehsal ili 2008 və aşağı olan avtomobillərimizi yenilədik. İndi “Uber”in bizi birdən-birə yeni bonusdan kənarda qoyması nə iqtisadi, nə də mənəvi baxımdan qəbul ediləndir”.
Sahibkarlar hesab edirlər ki, “Uber”in bu addımı sadəcə bonus siyasəti deyil – bazarda ədalətli rəqabəti pozan, yerli sahibkarları sıxışdıran bir qərardır. Onlar məsələ ilə bağlı aidiyyəti dövlət qurumlarını vəziyyətə müdaxilə etməyə çağırırlar.
