ABŞ prezidenti Donald Trampın nüvə sınaqlarının bərpası ilə bağlı bəyanatları ilə bağlı Rusiya hələ də Vaşinqtondan izah almayıb.
"Ölkə.az" xəbər verir ki, bunu Rusiya xarici işlər naziri Sergey Lavrov bildirib.
"Xeyr, biz hələ diplomatik kanallar vasitəsilə Prezident Trampın nüvə sınaqlarının bərpasını elan edərkən nəyi nəzərdə tutduğuna dair heç bir açıqlama almamışıq", - Lavrov deyib.
Nazirin sözlərinə görə, bunun nüvə silahı daşıyıcılarının sınaqdan keçirilməsinə, yoxsa bütün nüvə dövlətləri tərəfindən nüvə arsenallarının təhlükəsizliyini və döyüş hazırlığını qorumaq üçün həyata keçirilən, bu cür dövlətlərin könüllü öhdəliklərinə zidd olmayan və hələ qüvvəyə minməmiş Hərtərəfli Nüvə Sınaqlarının Qadağan Edilməsi Müqaviləsini pozmayan sözdə subkritik sınaqlara - yəni nüvə reaksiyası yaratmayan sınaqlara aid olub-olmadığı bəlli deyil. Yaxud bəlkə də Donald Tramp həqiqətən Vaşinqtonun tammiqyaslı nüvə sınaqlarını bərpa etmək niyyətindən danışıb", - Rusiya xarici işlər naziri əlavə edib.
Lavrov qeyd edib ki, Vaşinqton rəsmilərinin ictimaiyyətə sızdırılan şərhləri, ABŞ prezidentinin nə demək istədiyini ümumi şəkildə anlamadıqlarını göstərir.
Nazir vurğulayıb ki, Prezident Putinin noyabrın 5-də Təhlükəsizlik Şurasının iclasında verdiyi təlimat üzərində iş gedir. Nəticələr barədə ictimaiyyətə məlumat veriləcək.
Oktyabrın sonunda Tramp jurnalistlərə bildirib ki, ABŞ nüvə silahlarını sınaqdan keçirəcək, çünki digər ölkələr bunu artıq edirdi.
Elvin
Ölkə.az
