Azərbaycan Yazıçılar Birliyinin üzvü, Azərbaycan Qadın Sahibkarlar Assosiasiyasının idarə heyətinin üzvü, Türk Dövlətləri Qadınlarının Sülh Alyansının təsisçisi, xeyriyyəçi və ziyalı xanım Məhəbbət İbrahimovanın yaradıcılıq gecəsi böyük izdihamla keçirilib. Tədbir Azərbaycan Dövlət Himninin səsləndirilməsi və şəhidlərin xatirəsinin bir dəqiqəlik sükutla yad edilməsi ilə açılıb.
Gecənin bədii hissəsi Məhəbbət İbrahimovanın sözlərinə və Aybəniz Güllərin musiqisinə bəstələnmiş “Zəfər günün mübarək” mahnısının Gülüstan Əliyevanın ifasında səslənməsi ilə başlamışdır.
Tədbirdə çıxış edənlərdən Azərbaycan Qadın Sahibkarları İnkişafı Assosiasiyasının sədri Səkinə Babayeva bildirdi ki, Məhəbbət İbrahimova yalnız ədəbiyyatda deyil, həm də qadın sahibkarlığında, ictimai həyatda örnək simadır. O, yaradıcılığı ilə insanlara ruh verir, fəaliyyəti ilə qadınların gücünü nümayiş etdirir.
Səkinə Babayevadan sonra çıxış edən Yasamal rayon Mərkəzləşdirilmiş Kitabxana Sisteminin direktoru, tarix elmləri doktoru, Fəxri mədəniyyət işçisi Lətifə Məmmədova dedi ki, Məhəbbət İbrahimova yaradıcılığı ilə ədəbiyyatın, qadın zərifliyinin və vətənpərvərliyin təntənəsini yaşadır. Onun sözü oxucunun qəlbinə yol tapır, insanı düşünməyə, sevməyə və Vətən üçün yaşamağa səsləyir. Belə ziyalı qadınların varlığı bizim milli sərvətimizdir.
Lətifə xanım həmçinin qardaş Türkiyə ziyalılarının səmimi təbriklərini tədbir iştirakçılarına çatdırdı və Türkiyə Cümhuriyyəti tərəfindən Məhəbbət İbrahimovaya təqdim edilən “Atatürk mükafatı”nı təqdim etdi.
Türk dünyası Sülh Qadınları Alyansının sədri, sevilən bəstəkar Aybəniz Güllər çıxışında əlavə etdi ki, Məhəbbət İbrahimova kimi ziyalı qadınlarımız xalqımızın mənəvi sərvətidir. Onun misralarında sevgi, mərhəmət və Vətənə sədaqət birləşir. O, yaradıcılığı ilə insanlara yol göstərir, qadınlarımız üçün ilham mənbəyidir.
Milli İncəsənət Muzeyinin direktor müavini Nəzrin xanım qeyd etdi ki, Məhəbbət xanımın əsərləri təkcə ədəbiyyat deyil, həm də qadın ruhunun, Azərbaycan zərifliyinin güzgüsüdür. Onun yaradıcılığı klassik dəyərlərlə müasir baxışın nadir vəhdətidir.
Mədəniyyət Nazirliyinin Mədəniyyət üzrə Elmi-Metodiki və İxtisasartırma Mərkəzinin sektor müdiri Fariz Yunisli vurğuladı ki, Məhəbbət İbrahimova yaradıcılığında vətənpərvərliklə humanizm xəttini birləşdirə bilən nadir müəlliflərdəndir. Onun xeyriyyə fəaliyyəti, maarifçilik yönümü və sözə sevgisi nümunə olmağa layiqdir.
Binəqədi Rayon İcra Hakimiyyətinin nümayəndəsi Ziba Nəcəfova qeyd etdi ki, Məhəbbət İbrahimova təkcə istedadı ilə deyil, həm də vətəndaşlıq mövqeyi, xeyriyyəçilik fəaliyyəti və milli dəyərlərə sədaqəti ilə seçilən ziyalı xanımdır. Onun yaratdıqları qadınlarımız üçün bir məktəb, gənclərimiz üçün isə ilham qaynağıdır.
Əməkdar müəllim Həqiqət Məmmədova çıxışında vurğuladı ki, Məhəbbət xanımın yaradıcılığı bir müəllim üçün ən gözəl dərs vəsaitidir — çünki onun hər misrasında tərbiyə, sevgi və insanlıq var. O, sözün əsl mənasında həyatın müəllimidir. Biz onun kimi ziyalıların sayəsində gələcək nəsilləri mənəvi zənginliklə yetişdirə bilirik.
İlk qadın komandir, mayor Ayidə Şirinova qeyd etdi ki, Məhəbbət İbrahimovanın misralarında mən qadın qüdrətini və vətən sevgisini hiss edirəm. Onun yaradıcılığı qadının zərifliyi ilə döyüşçü ruhunun vəhdətidir.
Bakı şəhəri 238 nömrəli məktəbin direktoru Xuraman Osmanovanın rəhbərliyi ilə məktəbin şagird kollektivi tədbirdə iştirak edərək müəllifin yaradıcılığından ibarət bədii nömrə təqdim etdi. Şagirdlərin səmimi çıxışı və səhnə mədəniyyəti zaldakı tamaşaçılar tərəfindən alqışlarla qarşılandı, çıxış gecəyə həm gənclik enerjisi, həm də duyğusal dərinlik qatdı.
Tədbirdə tanınmış jurnalistlər, teleaparıcılar, sənətçilər və ziyalılar iştirak etdi. Gecə boyunca Məhəbbət İbrahimovanın həyat yoluna, yaradıcılığına və xeyriyyəçilik fəaliyyətinə yüksək ehtiram göstərildi. Onun sözləri və fəaliyyəti bu gün də gənc nəsillər üçün ilham mənbəyidir. Çıxışçılar göstərdi ki, Məhəbbət İbrahimova təkcə ədəbiyyat sahəsində deyil, həm də ictimai və xeyriyyəçilik fəaliyyətində ölkəmiz üçün nümunəvi simadır.
