Pentaqon atəşkəsə nəzarət üçün beynəlxalq missiyanın yerləşdirilməsini planlaşdırır...
Poliqon xəbər verir ki, ABŞ Müdafiə Nazirliyi (Pentaqon) İsrailin cənubunda, Qəzza zolağına yaxın ərazidə təxminən 10 min nəfərlik müvəqqəti hərbi baza tikintisi imkanını araşdırır. Bloomberg agentliyinin məlumatına görə, layihə beynəlxalq qüvvələrin İsrail və HƏMAS arasında mümkün atəşkəsə nəzarət missiyasını həyata keçirməsini təmin etməyə yönəlib.
ABŞ Hərbi Dəniz Qüvvələrinə aid daxili sənədlərə əsasən, baza tam avtonom sistem kimi fəaliyyət göstərəcək və 12 ay müddətinə nəzərdə tutulub. Layihəyə yaşayış binaları, ərzaq təminatı, enerji mənbələri və tibbi yardım mərkəzləri daxildir.
Sənəddə qeyd olunur ki, bazada ABŞ qoşunlarının deyil, digər ölkələrdən gələcək beynəlxalq sabitlik qüvvələrinin yerləşdirilməsi planlaşdırılır. Bu qüvvələr bölgədə atəşkəsin yerinə yetirilməsinə, humanitar yardımların təhlükəsiz daşınmasına və yenidənqurma prosesinin başlanmasına nəzarət etməli olacaq.
Ağ Ev məsələ ilə bağlı bildirib ki, sözügedən baza ilə bağlı hələ rəsmi qərar qəbul edilməyib və hazırda müzakirələr ilkin mərhələdədir. Ağ Ev rəsmiləri layihə sənədini “ordu daxilində işlənmiş daxili texniki material” kimi xarakterizə ediblər.
Ekspertlər hesab edirlər ki, ABŞ-ın bu təşəbbüsü bölgədə sülh prosesinin təhlükəsizlik infrastrukturunu yaratmaq cəhdi kimi qiymətləndirilə bilər. Lakin plan reallaşarsa, onun maliyyə dəyəri və logistik təminatı həm ABŞ, həm də İsrail üçün mühüm sınaq olacaq.
Poliqon.info
