Son illərin ən genişmiqyaslı geosiyasi böhranlarından biri olan Rusiya-Ukrayna müharibəsi yalnız regionu deyil, bütün dünyanı təsir altına alıb.
Politoloq Elxan Şahinoğlu News365.az-a bildirib ki, münaqişə artıq qlobal geosiyasi gərginliyin mərkəzinə çevrilib və beynəlxalq sistemin iş prinsipini ciddi şəkildə sarsıdır.
Rusiya-Ukrayna müharibəsi artıq sadəcə regional münaqişə olmur, qlobal geosiyasi qarşıdurmanın bir hissəsinə çevrilib. Onun sözlərinə görə, bu vəziyyət BMT və beynəlxalq hüququn təsir imkanlarını ciddi şəkildə məhdudlaşdırır, sülh mexanizmlərinin işləməməsi isə dövlətlər arasında etimadsızlığı artırır.
Şahinoğlu bildirib ki, Çin münaqişəni dayandırmaq və sülh prosesinə vasitəçilik etmək istəyi ifadə etsə də, bu təşəbbüslər nəzərəçarpacaq nəticə vermir. Bunun səbəbləri arasında Qərbin Çinə qarşı etimadsızlığı və Rusiyanın öz strateji maraqlarından geri çəkilməməsi dayanır.
Politoloq əlavə edib ki, Çin tərəfinin neytral mövqeyi Qərb tərəfindən Rusiyaya dolayı dəstək kimi qiymətləndirilir, bu isə Pekin ilə Qərb arasında siyasi, iqtisadi və ideoloji gərginliyi artırır.
“Rusiya-Ukrayna münaqişəsi artıq regional sərhədləri aşaraq qlobal geosiyasi oyunların mərkəzinə çevrilib. Müharibənin uzanması, sülh danışıqlarının dayanması və beynəlxalq institutların təsirsizliyi göstərir ki, dünya çoxqütblü, lakin xaotik bir sistemə doğru irəliləyir. Bu yalnız region üçün deyil, bütün beynəlxalq münasibətlər sistemi üçün uzunmüddətli sabitlik riskləri yaradır” – deyə Elxan Şahinoğlu vurğulayıb.
