Polşanın Baş nazir müavini və Xarici İşlər naziri Radoslav Sikorski Rusiyanın ölkəsində fəaliyyət göstərən son konsulluğu olan Qdansk Konsulluğunun işinə icazəni dəmir yolu sabotajına cavab olaraq geri götürmək qərarı verdiyini açıqlayıb.
Polşa PAP xəbər agentliyinin məlumatına görə, Sikorski keçirdiyi mətbuat konfransında Varşava-Lublin dəmir yolu xəttində baş verən sabotajla bağlı açıqlama verib.
Sikorski bildirib ki, Rusiya ölkəyə qarşı düşmənçilik əməllərini dayandırmadığı təqdirdə diplomatik və konsulluq varlığının daha da azaldılacağı barədə dəfələrlə xəbərdarlıq edib.
Rusiyanın Polşaya qarşı sabotaj hücumlarından vaz keçmədiyini, əksinə bu hücumları artırdığını qeyd edən Sikorski casusluq və sabotaj fəaliyyətlərinin insan itkilərinə səbəb olmağa yönəldiyi halda bunun artıq sadəcə sabotaj deyil, dövlət terroru olduğunu vurğulayıb.
Polşadakı son Rusiya konsulluğunun Qdanskda yerləşdiyini və bu konsulluğun fəaliyyət icazəsinin geri götürülməsi qərarını verdiyini bildirən Sikorski, qərarın bir neçə saat içində rəsmi nota ilə Rusiya tərəfinə çatdırılacağını qeyd edib.
Sikorski Rusiya ilə diplomatik əlaqələri kəsməyi planlamadıqlarını qeyd edərək, oxşar sabotajların baş verdiyi digər ölkələrin də əlaqələri kəsmədiyini xatırladıb.
Qdansk Konsulluğunun bağlanma qərarından sonra, Rusiyanın Polşada yalnız paytaxt Varşavadakı səfirliyi fəaliyyət göstərəcək.
