Xalq şairi Bəxtiyar Vahabzadənin 2005-ci ildə Fətullah Gülənə yazdığı iddia olunan məktub üzə çıxıb. Məktubun gündəmə gəlməsi ictimaiyyətdə müzakirələrə səbəb olub. Məktub niyə bu gün üzə çıxdı? Məsələnin aktuallaşmasını kimlər istəyir?
Globalinfo.az-a danışan araşdırmaçı yazar Həmid Herisçi baş verənlərin həqiqətə uyğun olmadığını bildirib.
O deyib ki, hər hansı bir şayiəni yayarkən həmin şəxslər öncədən onu test edirlər:
“Bu cür hadisələri cəmiyyətə təqdim etməzdən əvvəl sınaqdan keçirirlər. Səhv etmirəmsə, təxminən bir ay öncə Türkiyə mətbuatında Bəxtiyar Vahabzadənin adı hallanırdı. Bunun ardınca Rəcəb Tayyib Ərdoğan Bakıda Zəfər günü ilə əlaqədar tədbirdə Vahabzadənin şeirini oxudu. Şəhriyarın şeirini səsləndirəndə də ittihamlar başlamışdı. Azərbaycan-Türkiyə-İran münasibətləri anidən gərginləşmişdi”.
H.Herisçinin fikrincə, Bəxtiyar Vahabzadənin Fətullah Gülənə yazdığı deyilən məktub saxtadır:
“Hətta deyərdim ki, Zəfər paradında Vahabzadənin şeirini səsləndirdiyi üçün Ərdoğana qarşı təxribat törədilir. Bu, birbaşa Ərdoğanı hədəfə alır. Əgər bu adam Gülənlə məktublaşıbsa, deməli, Ərdoğana qarşı hesablanmış addımdır. Hər kəs bilir ki, Ərdoğanla Fətullah Gülənin münasibəti çox kəskin olub. Buna görə də baş verənləri təxribat hesab edirəm.
Ərdoğan Şəhriyarın şeirini səsləndirəndə bir cür, Vahabzadənin şeirindən sonra başqa cür zərbələrə məruz qaldı. Belə deyək də, məlum olsa ki, bunlar yazışıb, FETO-çu olublar və sair – o zaman Ərdoğan çətin vəziyyətə düşər. Adətən, bu cür zərbələr silsilə şəklində olur. Fikir verin, əvvəlcə Türkiyə təyyarəsi Gürcüstan səmasında qəzaya uğrayır, ardınca da Vahabzadənin “məktubu” üzə çıxır. Görünür, kimdirsə həm aviasistemdə güclüdür, həm də mətbuatda. Bunu Ərdoğana qarşı hazırlanmış planın, təxribatın ikinci seriyası hesab edirəm. Allah bizi 3-cü seriyadan qorusun”.
Qeyd edək ki, sözügedən “məktub”un “Can, qan, din qardaşım, əziz və möhtərəm Fətullah Gülən əfəndi!” müraciəti ilə başladığı bildirilir. Şair Gülənin təşəbbüsü ilə açılan məktəblərin “böyük hörmət və nüfuz qazandığını” qeyd edib, bu müəssisələrin fəaliyyətinə görə minnətdarlığını ifadə edib. Vahabzadə məktubda gələcəkdə türk dilinin dünya miqyasında önəmli yer tutacağına inamını dilə gətirir və bu istiqamətdə Gülən məktəblərinin rolunu vurğulayır.
