Bakı, 20 noyabr, AZƏRTAC
Gələn il mayın 24–28-də Bakıda keçiriləcək “SportAccord” Konvensiyası üçün nümayəndə heyətlərinin qeydiyyatı artıq başlayıb.
Bakı Şəhər Halqasından AZƏRTAC-a bildirilib ki, bu barədə 120-dən çox beynəlxalq federasiyanı birləşdirən “SportAccord” rəsmi açıqlama yayıb.
Tədbirdə beynəlxalq federasiya rəhbərləri, Beynəlxalq Olimpiya Komitəsinin nümayəndələri və aparıcı ekspertləri iştirak edəcəklər. Yerli və regional nümayəndələr üçün bu tədbir yeni əlaqələr qurmaq, bilik mübadiləsi aparmaq və idman dünyasının ən nüfuzlu qurumları ilə strateji tərəfdaşlıqları inkişaf etdirmək üçün unikal imkan yaradacaq. Qonaqlar eyni zamanda Bakının müasir siması, zəngin mədəni irsi və ənənəvi Azərbaycan qonaqpərvərliyi ilə tanış olacaqlar.
Gənclər və idman naziri Fərid Qayıbov növbəti mötəbər tədbirin ölkəmizdə keçirilməsi ilə bağlı fikirlərini bildirib. Nazir qeyd edib ki, ölkəmizin “SportAccord” Konvensiyasına ev sahibliyi etməsi Prezident İlham Əliyevin rəhbərliyi altında həyata keçirilən uğurlu idman siyasətinin göstəricisidir: “Ölkəmiz dünya idmanının aparıcı nümayəndələrini qəbul etməyə, səmərəli dialoq və əməkdaşlıq üçün şərait yaratmağa hazırdır. İnanırıq ki, bu tədbir idmanın inkişafına mühüm töhfə verəcək”.
Nümayəndə heyətlərinin qeydiyyatı təşkilatın rəsmi platformasında artıq aktivdir. İştirakçılara beynəlxalq idman təqviminin ən vacib tədbirlərindən birində yerini təmin etmək üçün qeydiyyatdan erkən keçmək tövsiyə olunur.
