Hindistanın Reliance Industries şirkəti Rusiya neftinin alınmasını dayandırdı
Hindistanda rus neftinin ən böyük alıcılarından biri sayılan Reliance Industries şirkəti 20 noyabrdan etibarən Rusiyadan öz Camnagar neft emalı zavoduna (NEZ) tədarükləri tamamilə dayandırdığını açıqlayıb.
Tribunainfo.az xəbər verir ki, bu barədə The Washington Post yazır. Məlumat ABŞ-ın əsas rus ixracatçılarına qarşı sanksiyalarının qüvvəyə minməsindən dərhal əvvəl yayılıb.
Məlumata görə, 1 dekabrdan etibarən NEZ-dən ixraca göndəriləcək bütün məhsullar Rusiyadan olmayan mənşəli neftdən istehsal ediləcək.
Ağ Ev şirkətin bu qərarını müsbət qarşılayıb. ABŞ prezident administrasiyası bildirib ki, Reliance Industries-in Rusiya neftindən imtinası və Hindistanın enerji tədarükünü diversifikasiya etməyə yönəlik geniş addımları iki ölkə arasında ticarət danışıqlarında əhəmiyyətli irəliləyiş əldə etməyə imkan verəcək.
Ekspertlərin fikrincə, Hindistanın Rusiyadan neft idxal edən ən böyük şirkətinin belə bir öhdəlik götürməsi olduqca müsbət jestdir. Bu addım ticarət sazişi üzrə danışıqların uğurla başa çatmasında həlledici rol oynaya bilər.
2021-ci ildə Reliance Rusiyadan cəmi 85 milyon dollarlıq neft almışdı.
2023-cü ildə bu rəqəm 11,7 milyard dollara çatıb.
Bundan əvvəl məlum olmuşdu ki, Hindistanın beş ən böyük NEZ sahibi dekabr ayı üçün Rusiya nefti ilə bağlı heç bir sifariş verməyib. Halbuki bu zavodlar ilin əvvəlindən bəri Rusiyadan alınan xam neftin üçdə ikisindən çoxunu təşkil edirdi.
Bu fonda Hindistanın Qiymət İndeksləri Mərkəzi (QİM) bildirib ki, 10–16 noyabr tarixləri arasında Rusiyanın dəniz yoluyla neft tədarükü gündəlik 291 min ton səviyyəsinə enib — bu, 2025-ci ilin əvvəllərindən bəri ən aşağı göstəricidir.
İmran Kərimli
