BAKI, 22 noyabr. TELEQRAF
“166” brendi altında fəaliyyət göstərən “Cargo.Az” MMC-nin direktoru 1000 manat cərimə edilib.
Teleqraf xəbər verir ki, buna səbəb istehsalatda baş verən bədbəxt hadisənin araşdırılması üçün əmək qanunvericiliyinə əməl olunmasına dövlət nəzarətini həyata keçirən müvafiq icra hakimiyyəti orqanına məlumat verilməməsidir.
Belə ki, “166” yükdaşıma xidmətinə məxsus “İsuzu” markalı evakuator İsmayıllı rayonu ərazisində qəza edib. Qəza zamanı sürücü xəsarət alıb və təcili yardımla xəstəxanaya aparılıb.
Qəzadan sonra şirkət tərəfindən Əmək və Əhalinin Sosial Müdafiəsi Nazirliyinə məlumat verilməyib. İnzibati tənbeh vermə haqqında qərardan görünür ki, işəgötürən tərəfindən istehsalatda baş verən bədbəxt hadisənin araşdırılması üçün hadisə baş verən gün əmək qanunvericiliyinə əməl olunmasına dövlət nəzarətini həyata keçirən müvafiq icra hakimiyyəti orqanına məlumat verilməyib.
Bu səbəbdən şirkətin direktoru 1000 manat cərimə edilib. Şirkət rəhbərliyi nazirliyə vaxtında məlumat verilməməsinin səbəbini izah edərkən bildirib ki, həmin vaxt Qurban bayramı olduğu üçün təqvimdə qeyri-iş günü olub.
Şirkət bu qərardan məhkəmə qaydasında şikayət versə də, şikayət təmin edilməyib.
