ain.az, Bizimyol portalına istinadən məlumat verir.
Elmi, sosial, siyasi yazıları ilə tanıdığımız məşhur alim, Lütfi Zadə adına Beynəlxalq Müasir Elmlər Akademiyasının həqiqi üzvü Nemət Məmmədlinin poetik ifadələri.
QARDAŞ KİMİ DOST YAXŞIDIR
Bir yad kimi qardaşdansa,
Qardaş kimi dost yaxşıdır.
Çünki, kimi mütləq deyil,
Bənzətmədir, dəqiq deyil.
Nə olursan özündən ol
Kimi olma, mi-mi olma,
Xətirə yox, könüldən ol,
Calaq olma, yamaq olma.
Öz tarının mizrabı ol,
Özgəsinin simi olma.
Zaman gələr sim qırılar,
Bərk ayaqda mizrab çalar
Yəni qardaş qardaş olsun
Məqamında dost tapılar.
15.8.2025.
Əziz dostum professor Yusubov
İsmixan müəllimin 80 illik yubileyinə.
İsmi Xan, zatən alim,
Həm də müdrik və salim.
Gülər üz, nurlu sima,
Hər kəlməsi bir məna.
Həyat eşqi aşıb -daşır,
Duyğuları çulğalaşır.
Yazdıqları bir məlhəmdir,
Hər məqamda könül açır
Vətəndaşdır qəlbdan-candan,
Yek kəlməsi Azərbaycan!
Halal olsun qüdrətinə,
Aşıb-daşan şöhrətinə.
Nəvələri işıq tutsun-
Tükənməyən hörmətinə.
11.9.2025.
AĞ AT GƏLİB YETİŞSİN
Ağ at gələn yollara,
Ağ qar yağdı, yol bağlandı.
Ümid dolu baxışlar
Yolsuz çöllərdə qaldl.
Tanrının mərhəməti
Hünəri, əzəməti
Kərəmin kəraməti
Bir günəşə bağlıdır.
Biz günəşin evladı,
Arzu dolu muradı,
Hünərinin amalı,
Həm də yetirməsiyik.
Günəşsiz həyat olmaz,
Günəşsiz canlı qalmaz.
Nə çəmən, nə bir çiçək
Nə cücərməz, nə açmaz.
Nə ağ at, nə qara at
Kükrəyib şahə qalxmaz.
Nə tikanlı qarağat
Kollanıb tikanlanmaz.
Günəşdir yaradanın
Ən böyük möcüzəsi,
Günəşdir kainatın
Nur saçan xəzinəsi.
Mərhəmətli insanlar,
Allahdan nur alanlar,
Günəş məramlıdırlar.
Onlar əməllərilə
Arzu diləklərilə
Ətrafa nur saçırlar.
Mərhəmət haqdan gəlir
Qüvvə verir yüksəldir.
O insan xoşbəxtdir ki,
Mərhəmətə tuş gəlir.
Gül açır arzuları,
Nur saçır baxışları.
İstəyilə birləşir
Ağ at gəlib yetişir.
2.10.2025.
DURNA QATARI
Gözləri yol çəkənlərin
Həsrətdən üzülənlərin,
Vüsal gözənlərin,
Ümid yeri, arzuları,
Görünür durna qatarı.
Bu qatar canlı qatardır,
Söhbətli, sözlü qatardır,
Durnalar ruha bağlıdır,
Onların duyğusu vardır.
Yayda yaylağa, qışda qışlağa,
Uçurlar hey uçurlar,
Uça-uça danışırlar,
Uça-uça oxuyurlar.
Sidq ürəkdən sevənləri,
Gözləri yol çəkənləri,
Yaman gözdən qoruyurlar.
Durnalar yorğun durnalar,
Həm görür,həm anlayırlar.
Taleləri vərəq -vərəq
Uca göylərdə yazırlar.
Uçurlar,uçurlar,uçurlar,
Ümidlə gözləyənlərə
Əhdi peyman kəsənlərə
Xoş xəbərlər çatdırırlar.
20.10.2025.
Nemət Məmmədli,
Lütfi Zadə adına Beynəlxalq Müasir Elmlər Akademiyasının həqiqi üzvü
Hadisənin gedişatını izləmək üçün ain.az saytında ən son yeniliklərə baxın.
