“Qlobal təhlükəsizlik sistemində müşahidə olunan dərin transformasiya XXI əsrin əsas geosiyasi rəqabət xəttini təşkil edən ABŞ–Çin qarşıdurmasını daha da kəskinləşdirir. Yeni çoxqütblü dünya modelinin formalaşması, güc mərkəzlərinin dəyişməsi və regional təhlükəsizlik mexanizmlərinin yenilənməsi iki dövlət arasındakı münasibətləri ticarət və diplomatiya çərçivəsindən çıxararaq geniş hərbi–texnoloji rəqabət müstəvisinə keçirib. Soyuq müharibədən sonra formalaşmış təhlükəsizlik sistemi artıq əvvəlki sabitlik funksiyasını itirir və bu boşluq qlobal güclər arasında yeni qarşıdurmalara yol açır”.
Bu fikirləri Aznews.az-a açıqlamasında siyasi şərhçi Aytən Qurbanova deyib.
Qeyd edək ki, dünya təhlükəsizlik sistemi sürətlə transformasiyaya uğrayır və bu, qlobal silahlanma yarışını görünməmiş həddə çatdırıb. Supergüclər və regional aktorlar arasındakı strateji rəqabət dərinləşdikcə, müdafiə xərcləri rekord səviyyəyə yüksəlir. Gərginliyin ən kəskin hiss olunduğu regionlardan biri Asiya–Sakit okean məkanıdır. ABŞ-ın qlobal liderliyini qorumaq cəhdləri ilə Çinin sürətli yüksəlişi arasındakı strateji rəqabət artıq yalnız iqtisadi və diplomatik müstəvidə deyil, həm də hərbi sahədə açıq şəkildə görünür. Pekinin Tayvan ətrafında təzyiqləri artırması, Vaşinqtonun isə AUKUS və QUAD kimi platformalar vasitəsilə Çinin təsirini məhdudlaşdırmağa çalışması bir çox analitikləri ABŞ–Çin qarşıdurmasının real silahlı münaqişəyə çevrilə biləcəyi barədə düşündürür.
Siyasi şərhçi qeyd edib ki, mövcud şəraitdə Çin iqtisadi, texnoloji və hərbi gücünü sürətlə artıraraq qlobal sistemdə daha təsirli aktora çevrilməyə çalışır.
