Şahbuz rayonunda yerləşən “Batabat” restoranının 9 aydır işçilərə maaş vermədiyi bildirilir.
AFN.az xəbər verir ki, restoranın millət vəkili Səttar Möhbalıyevə məxsus olduğu iddia olunur. İşçilər “Gündəlik Naxçıvan”a deyiblər ki, məsələ ilə bağlı Ali Məclis də daxil olmaqla bir çox dövlət qurumlarına şikayət etsələr də, nəticə əldə etməyiblər.
Onların sözlərinə görə, restorana rəhbərlik edən millət vəkilinin qohumu Ayxan Möhbalıyev maaş tələb edən işçiləri hədələyir: “Deyir ki, bura əmim Səttarın yeridir, ona da heç kim heç nə edə bilməz. Hara şikayət edirik, bizi geri qaytarırlar. Səttar Möhbalıyevin pulunu balta kəsməz. Ölkəni talayıb, üstəlik bizim maaşlara da göz dikir”.
İşçilər əlavə ediblər ki, uzun müddətdir maaş ala bilməmələri onları ağır maddi duruma salıb: “Aylardır maaş almırıq. Kimimiz 6, kimimiz 9 aydır maaş gözləyirik. Maaşımız 500-600 manatdır. Hamımızın ailəsi, uşaqları var, necə dolanaq? Borca düşmüşük, kredit götürmüşük. Bank borcunu istəyir, heç bir qurum isə şikayətimizi dinləmir. Aidiyyəti qurumlardan kömək istəyirik”.
Məlumata görə, “Batabat” restoranı əvvəllər Talıbovlar ailəsinin nəzarətində olan “Nəqşicahan Holdinq”in tərkibində fəaliyyət göstərib. Vasif Talıbov vəzifədən uzaqlaşdırıldıqdan sonra restoran Naxçıvan Həmkarlar İttifaqları Şurasının balansına verilib. Daha sonra obyekt Azərbaycan Həmkarlar İttifaqları Konfederasiyasının ovaxtkı sədri Səttar Möhbalıyev tərəfindən özəlləşdirilib və hazırda müəssisəyə onun qardaşı oğlu Ayxan Möhbalıyev rəhbərlik edir.
